<جوجل اناليتكس>
الرئيسية / رأي / إلى شباب مصر من الجنسين وبدون مع التحية!

إلى شباب مصر من الجنسين وبدون مع التحية!

بقلم شيرين البارون

أولا: إلى الشباب

عيب عليكم اوي اللي بيحصل ده يا من يفترض أنكم ” مستقبل مصر “!!.. لما تبقى شاب لِسَّه في مقتبل العمر و تقدر تشتغل و تشيل زلط و تبقى لِسَّه مستنى بابا يصرف عليك يبقى عيب عليك شبابك !!… لما تبقى خريج جامعي في العشرينات من عمرك و مضيع وقتك في القعدة على القهاوي و زعلان اوي ان السكر بقى غالي فغلّى عليك كوباية الشاي اللي بتاخد تمنها بلطجة من أمك و ابوك.

لأن جنابك مش متربي و عاله عليهم مش عاوز تشتغل بس فالح تسب و تلعن في البلد و اللي جابوها و اللي عملوها و كمان تضغط عليهم اكتر و تجبرهم يوفروا لك تمن تذكرة سفر تسافر تتشرشح بيها في بلاد الناس التانية اللي هايطلعوا عينك شافعي و مالكي و حنبلي و يبقى على قلبك زي السكر علشان جنابك مش عاوز تنحت في الصخر في بلدك بس تشتغل زبال و كناس و خدام عند الناس التانية يبقى انت كدة قليل الأدب و مش متربي و تستحق الشنق في ميدان عام.

لما تبقى قاعد حقود في بيتكم مستني جنازة و تشبع فيها لطم على البلد لما تنهار علشان تثبت لنفسكم انك على حق و مستني الحكومة تصرف عليك و تأكلك و في ناس أولى منك يستحقوا لأنهم عجزة و لا يقدروا على الإنفاق على نفسهم يبقى انت كدة واطي و معدوم الضمير و الإنسانية و جنسيتك خسارة فيك …

ثانيا: إلى الشابات

و انتي يا لوزة يا بندقة يا دلوعة مامي و بابي مالك ياختي مش طايقة نفسك ليه و بتنفخي من الزهق و الملل و مش عارفة تعملي حاجة تجيبي بيها فلوس تصريفها على ماكياجك و لبسك و الكوافير و غيره و غيره و غيره … طيب ما تشتغلي يا حبيبتي انشالله تعملي اكل و توزعيه على الموظفات اللي راجعين من الشغل و لا تعملي لك مع صاحباتك اي مشروع صغير تاكلوا منه عيش و لا لأ انتي نوغة صغيرة مش بتاعة بهدلة يا عيني و … البلد هي اللي وحشة و مقصرة في حقكم.

يا شيخ بلا قرف ده إنتوا مش بس مقرفين ده انتو مقززين … و على فكرة … و إنتوا بتبلطجوا على اهاليكم أبقوا خلوهم يجيبوا لكم فيزا لفرنسا علشان تشوفوا الشحاتين في ارقى شوارع باريس و هم بياكلوا من الزبالة يمكن يبقى عندكم دم و تحمدوا ربنا على اكبر نعمة في حياتكم و هي ” مصر “… على الأقل لاقيين الفول و الطعمية في غيركم مش لاقيين حاجة خالص و بيناموا في الشوارع تحت المطر في عز التلج و يموتوا في حالة اقل من قطط الشوارع …

 

بقلم شيرين البارون

شاهد أيضاً

الإتصال التسويقي المتكامل

الإتصال التسويقي المتكامل

بقلم الباحث: أمير محمود الهاشمي المقدمة الاتصالات التسويقية المتكاملة هو مفهوم بسيط. ويضمن ربط جميع …