موقع مقال موقع تواصل اجتماعي يتخذ من المقال وسيلة تعبير وتفاعل، وينتج فيديو عن كل مقال
بقلم ايمان محمد
هذا اول مقالاتي على هذا الموقع ، لا اقصد اهانة اى اعلامي ذكر اسمه في هذا المقال او التقليل منه ، لكن كمواطنة مصرية عادية اردت ان اقول وجهة نظرى فى اعلامنا المصري.
مدينة الانتاج الاعلامي اسم جميل خصوصا انه مقترن بالانتاج، احنا كمصريين بندعى ربنا دايما ان عجلة الانتاج تدور ولا تتوقف، لكن اكاد اجزم ان العجلة الانتاجية الوحيدة اللى بندعى انها تعمل حادثة وتقف خالص هى عجلة الانتاج الاعلامي، طبعا الاسباب كتيرة ومتشعبة ومتفردة ومتلظلظة هحاول اسردها في قصة قصيرة من خلال رحلتى لمدينة الفساد الاخلاقي يووووه قصدى مدينة الانتاج الاعلامي.
- اطلع من برنامج لبرنامج ومن فخ لفخ والمذيعين يشلونى طيخ طاخ طوخ طخ
- ده حالى مع برامج التوك شو اللى اقتحمت حياتنا وعكننت على اللى جابنا
وبما انى دايما مهمومة بحال بلادى قولت لازم اروح لمذيعى التوك شو مدينة الانتاج الاعلامى وأقابلهم واقولهم الناس زهقت منكم بقى ارحمونا، كان صعب ومستحيل ادخل المدينة فكان لازم اتنكر عشان اعرف ادخل ،،، ضربت شعرى فى الخلاط وعوجت لسانى يعنى حرف السين نطقته ثين والراء غين ،،، وقررت ادخل من البوابة الرئيسية الامن وقفنى ،، واول مااتكلمت وشافونى قالوا علطول، حضرتك مذيعة صح
قولتلهم صح ،، ودخلونى فورا
عمرو أديب
فكرت كتير اروح الاول للميس ولا لجوزها عمرو ولا ابدأ بوائل الابراشى ولا احمد موسي ولا ولا ولا اصل هما كتير اوي، المهم قولت ابدأ بعمرو اديب خصوصا انه اليومين دول محتاج دعم كبير عشان القناة الجديدة، وقفت على باب الاستديو لقيت عمرو قدامه جمبرى واستاكوزا وبطاريخ من الحجم السوبر وقاعد ياكل وبعد ماخلص فضل نص ساعة يسرح شعره.
- فبسأل المساعد بتاعه :- كل ده اكل
- قالى اه هو بيجهز نفسه للبرنامج
طب ازاى بياكل الاكل ده كله ويطلع بعدها يتكلم بلسان الناس الغلابة بأى مصداقية هصدقه، طب مش مهم الاكل خلاص اموت و اعرف نص ساعة الكوافير بيسرحله ايه وهو اصلا اقرع.
وائل الابراشي
قولت اروح اشوف وائل حريقة قصدى وائل الابراشي ،،، لقيته قاعد على يمينه ضيف متعصب وبيسب ويشتم وعلى شماله ضيف بيشد فى شعره ووائل الابراشى ماسك شبشب، زى ماري منيب فى فيلم حماتي قنبلة ذرية
يخبط بيه ويقول طوبة على طوبة خلى العاركة منصوبة ،،،،
ياختااااااااااى فضلت 12 ساعة من العاشرة مساءا للعاشرة صباحا وهو قاعد يسخن فى الضيوف ويوقعهم فى بعض لحد ماكنت هولع فيه وفى الاستديو، لما مذيع يفضل يحرض ويوقع ويولع لبعد الفجر الناس هتروح شغلها الصبح ازاى
أماني الخياط
قولت مبدهاش بقى اروح لست الكل أماني الخياط يدوب لسه بفتح باب الاستديو عليها لقيتها بتزعق وتشخط وتتعصب على المشاهدين
شوية وكانت هتقوم تغزهم فى نضارتهم قولت استنى اشوف بتقول ايه لقيتها بتقول
- شعب 7/3 اوعوا تنسوا او تتناسوا ان فيه على مصر مؤامرة كونية حلزونية مهلبية واننا فى خطر داهم والقطر هيدوس علينا كلنا لو لم ننتبه.
- يا شعب 7/3 لما تروح تجيب التموين ومش تلاقى سكر دى مؤامرة.
- وانت نازل من بيتكم رايح الشغل والتاكسى ميرضاش يقف ليك دى مؤامرة.
- ولما تقبض مرتبك واحد فى الشهر ويخلص اتنين فى الشهر دى مؤامرة
- فاهمييييييين فوقوا بقى الله يحرقكم شعب قرفتونا وزهقتونا وجننتونا
انا الصراحة لما لقيتها بتصرخ كده اتخضيت اول مرة اشوف مذيعة تذنب الشعب وشوية وهتمده على رجليه ?.
توفيق عكاشة
انا خووفت وجريت وقولت مفيش غير العوكش وانثى العكوش حياة الدرديرى اروحلهم الناس دي، شوية وطلعوا على الهوا، شوية وعكاشة وهو على الهوا بينادى عز
- ياعز انزل فاصل
- ياعز هات التقرير
- ياعز مين دخل علينا الاستديو
- ياعز اخصم للمنتج عشين جنيه
فسألت اللى قاعد على باب الاستديو مين عز ده، قالى مفيش حد هنا اصلا اسمه عز ده كائن هولامى من اختراع العكش ??، فضلت ساعة اضحك ،،، قولت مش مهم المهم اسمع ابو الوطنية كلها عكاشة بيه افندى
فجاة لقيته قابل السفير الاسرائيلى، وكمان عزمه على العشا، وفجأة اعلن انه راح اسرائيل، وفجأة اعلن انه هيروح الكنيست الاسرائيلى يخطب فيه، وفجأة اعلن ان حل مشاكل مصر فى ايد اسرائيل، اومال فين كلامه عن الماسونية العالمية الصهيونية اللولبية، وفين كلامة عن العروبة والمسجد الاقصى، وفين كلامه عن ان اسرائيل هى ألد اعداء مصر
انا كمواطنة اتصدمت من اعلاميين بيسموا نفسهم نخبة المجتمع وهما فى الاساس نكبة هذا المجتمع واتمنيت لو حد يرشنى ببيرسول او فنيك عشان ارتاح من الوشوش دى، بس الحمدالله هو اللى اترش واختفى
طيب اروح فين انا دلوقتى اسيبني من السياسة خالص واروح قسم الكورة للتحليلات الفنية لصاحبها شلبوكا هلا هلا ،، خلاص اروح اتفرج على مدحت شلبى، وعلى الاستديو التحليلي لمباراة مصر وغانا بس ياترى هيبدأ امتى الاستديو؟
- سألت مسؤول الاستديو فقالى التحليل هيبدأ قبل الماتش باربع ايام وبعد الماتش هيفضل اسبوع
- ايوه وبالنسبة للناس اللى وراها شغل تروح شغلها ازاى
- مااحنا يافندم لازم نعمل سبوبة حلوة ونلم شوية اعلانات وكده كده الناس بتروح شغلها متأخر هاهاهاها
- يخربيت ضحكتك الرخمة ،، اومال فين الكابتن شلبوكا
- بيصبغ
سيبته ومشيت وانا بفكر اغير يافطة مدينة الانتاج الاعلامي واكتب مكانها مدينة الفساد الاخلاقي والاحباط الشعبي.
