هي الازمة بتعدي بسلفة ولا بالهمة, ما تشوف اليابان واتعلم

ياسيادة الرئيس بكاءك اليوم علينا ام لينا, قبل البكاء ياكبير شوف ايه اللي هتعملة للمواطن الشحات والشحات ده اللي هما حوالي 85 % من شعبك الجميل ياريس احنا اتشلحنا ومعدش فاضلنا حاجة خلاص.

ياريس احنا بنوعاني جامد ياكبير مصر الحق اهل مصر من المجاعة, كان قرض اسود علي دماغ الكل ليه محسبتهاش قبل ما تاخد القرض والاسعار تولع كده والدعم يتشال من الغلبان تقدر تقولي عملت ايه لمواطن اللي اصلا مش عارف يأكل ولادة ايام ما كان في دعم طيب دلوقتي يعمل ايه ياريس مش كنت تحسبها قبل ما تعوم الجنية وتشوف شغل للشباب العاطل ولا زي ما وزيرك بيقول يشتري توكتك

ياكبير المرض دب في اوصال الشعب والعلاج غلي، مش كنت تبص علينا ولا الحكومة فهمتك ان المواطن مش هيفرق معاه جوز جنيهات زيادة على السكر ولا العيش ولا الزيت ولا الدوا قاللولك ان الشعب يبلبس وبيصرف ومروق علي الاخر احب اقولك ان في ناس عايشة اصلا يومها بالجوز جنيهات دول.

ذل وقهر

ياريس ارحموا الشعب لان بجد شوفنا ذل وقهر محدش شافة ياريس الحكومة بتحاول توصلنا يااما الغلاء او الفوضي اما الامان او القتل اما الرضوخ او الاستعباد ياريس بص لولادك وشعبك من جوة بيت الفلبان والفقير والمحتاج مش من جوة شاشة الايباد والتلفزيون والاعلام الفاسد ياريس ميغركش حلق الحاجة زينب والشو الاعلامي ده ياريس بص للمواطن المحتاج والمحتاجيين كتير وفر لينا مصانع واحنا نشتغل ادينا ارض واحنا نزرع ادينا مراكب واحنا نصطاد او ولع فينا واحنا ندفا بنارنا وبالمرة نرتاح ياريس