المهمة المستحيلة

 

او المهمة المستحيلة . . سلسة من الأفلام تعتبر إستكمال لمجموعة أفلام جيمس بوند الشهيرة. واللى البطل فيها بيقوم بعمل مهمة مستحيلة بالنسبة للأشخاص العادية. وبعد بحث وتدقيق فى المخطوطات الفرعونية القديمة عرفت إن فكرة الأفلام مستوحاه من الحياة المصرية القديمة والصراع الأبدى بين الست المصرية – سواء كانت أم أو زوجة – وباقى أفراد أسرتها.

من زمان والراجل بيحاول ينفذ المهمة المستحيلة ويعمل اللى نفسه فيه من غير ما مراته تعرف، مهما أخد من إحتياطات أو عمل نفسه ناصح ومأمن نفسه.

كل مرة بيتقفش باللى عمله وتحصل المعركة بينهم من غير ما يفهم هى عرفت إزاى. مش كدا وبس، دى كمان عندها قدرة إنها تعرف الراجل كان فين من قبل ما العلم يوصل لتكنولوجيا برامج التتبع وفضايح ال Location وال Check-in.

ناس قالت إنها “مخاوية” جن وعفاريت وناس قالت إنها قريبة من ربنا أوى، وفى الغرب بعد دراسات كتير قرروا إنها تمتلك الحاسة التاسعة، ودى حاسة بعد السادسة بشويتين. يعنى تعددت التعاريف والنتيجة واحدة، هتعرف يعنى هتعرف.

ومين فين ما نزلش يلعب بلاى إستيشن من ورا مراته أو أمه وأتعمل عليه حفلات من أصحابه من كتر ما إتغلب فى اليوم دا، ولما رجع إكتشف إن مراته كانت عارفة، إزاااااى الله أعلم.

ولو راجل عارف واحدة تانية على مراته بتقفشه بنفس السهولة اللى بتحط بيها مانكيير فى إيديها ، ولما يسألها عرفتى منين ، بترد عليه بمنتهى الهدوء ” من عند ربنا “. بركاتك يا شيخة J

ثبت كمان إن الزوجة المصرية إذا كانت مش راضية عن المشوار اللى جوزها رايح يعمله، بتكون النتيجة كارثية، لأن فى اللحظة دى بتجمع بين قوتين خارقتين فى نفس الوقت ” لعنة الفراعنة لأنها مصرية والحاسة التاسعة اللى هى قريبة من ربنا”.

أعرف واحد فريقه خسر الدورى 7 سنين ورا بعض، بسبب إنه كان بيحب ينزل يتفرج على الماتشات فى مكان معين وهى مش راضية، يقوم الفريق يخسر أو يتعادل لغاية ما الدورى يروح منه.

ويا سلام بقى لو هى عايزة تخرج وإنت عايز تلعب كورة مع أصحابك وعملت اللى فى دماغك، مبدئياً لو بتلعب مع منتحب البرازيل هتتغلب، مش كدا وبس دا إحتمال ترجع مصاب وشكلك فى الملعب وإنت بتلعب بيكون شبه محمد هنيدى وهو بيلعب كورة فى فيلم إسماعيلية رايح جاى.
جباااااااااااااااااااااار

وفى نوعية بقى من الزوجات دى مش موجودة فى أى مكان فى العالم غير عندنا، حاجة كدا حصرية وشغل فاخر من الآخر. النوعية دى بيسموها “ذات الأحلام الفولاذية”. دى بقى الله يكون فى عون اللى يتجوزها.

دى بتصحى من النوم تحكى لجوزها المصيبة اللى عملها كأنها كانت قاعدة معاه وفى مراحل متقدمة بتحلم بالمصيبة اللى بيفكر يعملها، ودى اللحظة اللى جوزها بيشك فيها إنه بيتكلم وهو نايم، ويبتدى يمشى فى طريق المنبهات ويبقى أعز أصحابه القهوة والنسكافيه علشان ما يتفضحش.

وعلشان كدا هتفضل الزوجة المصرية هى أفضل إختيار على مر التاريخ لأنها بتحافظ عليك من أفكارك الشريرة وبتخلى بالها منك أكتر من نفسك.

فيديو المهمة المستحيلة