الشيطان موجود في البيت ؟

قاعد معنا لا يتحرك بل يتكلم كثيرا ونحن نجلس كل يوم نسمعه وهو يتكلم …. ويتكلم عن كل شئ هو عايزه وبحريته …الشيطان قاعد بيتكلم في حاجات مفيدة وحاجات غير مفيدة … اقصد هنا عن التلفزيون ( اي مواد الكترونية ) اللي اصبح زي الشيطان بتتكلم عن كل حاجة بحريه تامه لا رقيب عليها .. عايز تتفرج علي جريمه الشيطان بيجبلك لحد عندك الجريمه وبيجبلك صورتها وبيسمعك طريقة التنفيذ .. عايز تتعلم الطبخ برضو بيجبلك طريقة الطبخ وبتتعمل ازاي … انت مش محتاج تسمع حد …؟ انت محتاج حد يسمعك لان الشيطان بيتكلم براحته عن اللي هو عايزه مش اللي انت عايزه ….؟

انت بتبقى عايز حد تتكلم معاه عن اللي انت عايزه بس للاسف مفيش .. الشيطان هنا بيجبلك الاشخاص اللي هو عايزهم يتكلموا عن اللي هو عايز يتكلم فيه ….. وطبعا بتسمعه اجباري مش اختياري ؟ لانك بشر وبتحب تسمع الاشياء المثيرة..اللافتة للنظر وبتبقى متشوق اكتر واكتر للسمع وجواك الف سؤال عايز تساله للشيطان بس مش بتلاقي اللي يسمع الالف سؤال بتوعك.

وحتى لو سمعوا الالف سؤال بتوعك مش بتلاقي اجابه ملفوفة ومدورة ومدروسة كويس بتلاقي الاجابات متشابهه مش مختلفة عن بعضها …اه والله العظيم بتلاقي الاجابات متشابهه,

وتفضل تقول ايه ده!؟ انا عايش حياة مكرره ولي اية !؟

لا ياعزيزي الحكاية ان الاجابات دي بتكون مكتسبة بدون تدوير لعقل المتلقي … زي ما بنقول ( حافظين مش فاهمين … فاهمين مش حافظين ). الحكاية انهم بيتلقوا بالحفظ بدون فهم …..

طبعا عندك مواضيع كتير الشيطان اتكلم عنها في الفترات الاخيره وطبعا المواضيع دي متكرره جدا وبدرجة فظيعه وشاذة … زي اية طبعا انا هنا مش هقدر اجيب كل المواضيع ..

تبادل الزواج

مثلا موضوع ( تبادل الزواج ) اللي الشيطان مهتم بيه اوي وشغال يذيع الخبر كانه جديد مع ان موضوع تبادل الزواج دة اقسم بالله في كتب علم الاجتماع هتلاقية قديم جدا وان تبادل الزواج درسناه في علم الاجتماع في كتب الزواج والاسرة وفية كتب الزواج العائلي منذ النشاه ومازال موجود حتي الان في المجتمعات الغربية والعربيه والهنديه …. درسنا تبادل الزواج باسم مختلف…. في كتب علم الاجتماع كان اسمه اشكال الزواج بأن المرأة تتزوج أكثر من رجل في وقت واحد وده كان موجود في كتب علم الاجتماع بس بمعنى مختلف جدا … بس مش عارف لية الشيطان اهتم اوي بالمواضيع دي وانتشرت انتشار رهيب مع ان المواضيع دي موجودة منذ القدم و منتشرة من زمان الزمان وزي ما قال الدكتور مصطفى محمود

ان الانسان لم يتطور بل الذي تتطور هو ادوات الانسان ….

واصبحنا الان نشاهد الاشياء المخالفة للقيم الدينيه والمجتمعيه اللي كلنا اتفقنا انه مخالفة علينا واننا مش هنتقبلها بس للاسف احنا بنتقبلها ,, هتقولي ازاي بنتقبلها؟ , اقولك ازاي …

انت اديك تقبلت انك تسمع وتشوف حادثة زي تبادل الزوجات وتقوم بقراءتها بالكامل مع ان فيه خبر جمب نفس الخبر اللي انت بتقرا اسمه قصة كفاح شاب مثلا او رجل ينام عالرصيف او اي خبر تاني بس علشان انت كبشر بتعشق الشيء المخالف فتقوم بقراءة الشيء المخالف….

دة الطبيعي داخل البشريه كلها في العالم كله ….

فيديو مقال الشيطان في بيوتنا (تبادل الزواج)