ده المبدا اللى المفروض يتعمم فى بلدنا العزيزة مصر ونظرا لانى بنت فالمبدا ده انا متمسكة بيه جدا

ليه اسكت؟

ليه اسكت وازاى اسكت اصلا عن انك بتنتهك حق من حقوقى ده لو مكنش ابسطها انى امشى فى شارع وما اخافش انى لما اكون فى مكان مااجريش عشان اروح قبل مالوقت يتاخر ده اللى هو يبقى 10 مثلا والاقى اللى بيضايقنىى ويسمعنى كلام مش من حقه انه يقوله ليه امى تقلق عليا وتكلمنى كل شويا نظرا لان الناس مالهاش امان ليه افضل كماشية ابص ورايا واللى يعدى جانبى اركز معاه ليه افقد الثقة فى انى اعيش حياة كريمة لمجرد انى بنت !!

ليه اعيش فى بلد تقاليدها بتقول ان البنت اللى بتدافع عن نفسها مسترجلة؟ واللى بترد تبقى قليلة الادب وان اللى تحكى تبقى بجحة وان هى السبب فى الجريمة هى المظلومة الاولى والاخيرة فيها وان لبسها عامل اساسى فى كل حاجة برغم ان نسبة 80% من اللى بيتم التحرش بيهم محجبات !!

التحرش

التحرش مش بس باللمس .. الكلام برضو تحرش, البصة تحرش, انت ليه تبصلى اصلا؟ ليه تدى نفسك الحق انك تعلق على شكلى لبسى او ابتسامتى او عنيا؟ مين انت عشان تتفحصنى بنظرات بشعة مين انت عشان تدى نفسك الحق انى امشى فى ىالشارع خايفة !!

عزيزى المتحرش احب اعرفك انك مجرد حيوان من ضمن الحيوانات ولا البيئة ولا الظروف ولا البنت هىى السبب فى انك اصبحت متحرش انت انسان مريض وغالبا مالكش علاج غير القانون وصدقنى شكلك هايكون ساعتها وحش جدا ..

انا من الناس اللى سافرت والفترة اللى كنت فيها خارج مصر مع الرغم انى كنت برضو فى دولة عربية محدش قدر يبصلى بصة واحدة مالهاش اى لازمة حتى لو مصرى محدش قدر يقرب منى محدش قدر ينتهك ابسط حقوقى انى امشى فى الشارع مش خايفة  !!

دى دعوة منى لكل بنت انها حرفيا تدى اللى يتطاول عليها بالجذمة طالما مفيش قانون يردعه طالما التربية بقت منعدمة طالما خلاص بقينا بندافع عن المتحرش وبنطلع مبررات كمان ليه وطالما مبقاش فى فايدة فى الموضوع والحال بقا من اسوأ لاسوأ,

اللى يقرب منك اقلعى جذمتك واضربيه بيها, انتِ صاحبة حق انتِ مش ضعيفة انتى انسان خلقه ربنا ومن حق اى حد انه يحترمك انتى مش عروسة فى محل معروضة للى يسوا واللى ميساوش يتفرج عليكى انتى كيان وروح زيك زيه بغض النظر عن انك انظف من اى حيوان من الحيوانات اللى احنا بنتكلم عليهم هنا اصلا ..

عزيزتى المراة متخافيش ..

فيديو المقال ليه اسكت لما ممكن اديك بالجذمة؟