http://www.population.io/
_________
الموقع دا رهيب بجد 😄💙, هتعرف منه معلومات قيمة كتيره وتهمك :

1- فى الأول كدا -من قبل ما تدخّل بياناتك- هتلاقي عداد شغال فوق وفيه صور أطفال بتزيد عددها ورقم بيعبّر عن عدد سكان العالم الآن , وطبعا الرقم بيزيد كل ثانية وانت في الموقع (حتى الآن عدد سكان العالم وانا بكتب المقالة وصل ل7,536,630,736)😂✋

2- بعد ما تسجّل بياناتك (تاريخ ميلادك , البلد و النوع) هياخدك على النقطه الجهنمية التانيه … هتعرف منها كام واحد أكبر منك وكام واحد أصغر منك فى العالم كله (أو فى بلدك) وعلى أساسه هتعرف إنت كبير ولا صغير فى السن بالنسبة للعالم (أو بالنسبة لبلدك) (أنا مثلا لقيت إنى أكبر من 34% من العالم و أكبر من 42% من المصريين , 42% من ال90 مليون مصري أصغر منى😂😂✋)

ملحوظة 1 :

[هتلاقي فى رسم بياني هيظهرلك عدد السكان حسب العُمر وهتلاقي في حاجه غريبه وعجيبه قوي , إن مثلاً فى مصر فى 463 واحد عندهم 99سنه 😮 ]

ملحوظة 2 :

[فى 6 نقط لونهم رمادى على اليمين تقدر منهم تتنقل فى الموقع]

3- النقطة دى حلوه قوي وهتبهرك , هتعرف منها هتموت إمتى 😂 على حسب التوقعات اللى بتعتمد على متوسط أعمار البلد (أو العالم) وكمان تقدر تشوف لو انت من بلد تانى أو ساكن فى بلد تانى كان هيبقي مُتوقَع هتموت امتى (ودا اعتماداً بردو على متوسط أعمار الناس فى البلد دى) , هتلاقي فى مستطيلين وما بينهم (v.s) اكتب فى خانة “اسم بلدك” والخانه التانيه “البلد التانيه”.
وكمان فى حاجه جهنمية 💙 تانيه تقدر تعرفها من النقطه التالته دى , هتلاقي على اليمين فوق الخريطه فى خط مدرّج بأرقام بتعبر عن سنة ما , هتعرف من الحته دى إن المتوقع فى سنة 2017 إن عمرك ينتهى بعد سن 77.3 سنة مثلاً و لو كنت فى 1967م كان عمرك هينتهى بعد 69.4 سنة . 💙✋

ملحوظة 3 :

[ما يعلم الغيب إلا الله أكيد ]

4- النقطة دى بتوضحلك الأحداث الهامة ليك اللى هتحصلك فى العالم لحد ما تموت -ربنا يطوّل فى عمركم^^- زى مثلا انا قالى إن فى تاريخ 3 مارس 2021 اللى جاى هيكون ترتيبي ال3 بليون فى العالم يعنى هكون وقتها أكبر من 2,999,999,999 نسمة فى العالم 😂✋

5- النقطه دى حلوه قوي, هتوضّحلك عدد الأشخاص اللى بيشاركوا يوم ميلادك 👌❤, يعنى اتولدوا فى نفس اليوم (يعنى بالنسبالى فى 321,679 توأم ليا على الأرض 😂✋ ) وكمان هيبيّنلك اللى اتولدوا فى نفس الساعه منكم ! , وفى الرسم البيانى الدائري هيوضّحلك أكتر البلاد اللى اتولد فيها اشخاص فى نفس يوم ميلادك (أغلب توائمي من الهند 😂 )

6- نقطة اتكلمنا عنها قبل كدا , بس فى حته كدا فى اخر الصفحه من الموقع خالص اسمها “people live in extreme poverty” بتوضحلك عدد الناس اللى هما تحت خط الفقر فى العالم , واللى استغربتله إن العدد دا بيقل كل شويه وانا ع الموقع , هل يا ترى الناس بتموت !! ولا بيغتنوا !! 💔😞 ؟

 

• موقع (population.io) و ما نستفيده من معلوماته