<جوجل اناليتكس>
الرئيسية / مشاعر / البنت اللي بتحبك ” رزق “.

البنت اللي بتحبك ” رزق “.

أبناء جنسي الأعزاء – الرجاله – لو في حياتك واحده بتحبك بجد لو سمحت أعتبرها رزق من ربنا .. اه البنت اللي بتحبك ” رزق ” ، لو بصيتلها من المنطلق ده كل حاجه في علاقتك بيها هاتتغير ؛ انا عندي قناعه شخصيه و علي يقين تام ان أي راجل فينا بيقول أنه بيفهم البنات او الستات مدعي و كداب و هجاص ، ببساطه شديده اذا كان هم نفسهم مش فاهمين نفسهم انت فهمتهم ازاي ؟! ، لكن ده مايمنعش اننا نحاول ، و مانصحكش تتعامل معاهم كلهم بنفس الطريقه لأنك هتبقي زي اللي مذاكر ماده واحده و بيدخل بيها كل الأمتحانات .. هاتلبس !

ربنا خلقنا مختلفين عن بعض

أحنا كرجاله بنتكلم بلغه ” العقل و المنطق ” و هم بيتكلموا لغه أعمق و أصعب علينا أسمها ” المشاعر” ، و – أغلب – مشاكلنا معاهم سببها أننا بنفترض فيهم المنطق و هم بيفترضوا فينا المشاعر و الأحساس بالأشياء زيهم و الحقيقه المؤسفه ان لا هم بيبقي عندهم منطقنا و لا أحنا بيبقي عندنا مشاعر .. لكن في أمل.

و لأنهم كائن ذكي – عاطفيا – جدا فاهي عمرها ماهاتقولك مشاعرها بطريقه مباشره و هاتفترض فيك – مخطئه طبعا – نفس الذكاء و أنك هاتستوعب و تفهم مشاعرها لوحدك لأنها لو قالتلك هي محتاجه منك أيه هاتفقد معناه و هيبقي مالوش قيمه بالنسبالها ، و عشان أحنا – خايبين بالفطره – في الموضوع ده فالحل أنك تسمعها و تحاول تفهمها و تفهم مشاعرها و معلش أهتم و ابسطها ؛ أهتمامك بالحاجات الصغيره اللي هي بتحبها و بتفرحها و محاولاتك لفهمها هايفتح لك ” أبواب جنتها ” .. و لو مش مصدق جرب !.

دور في البنت اللي بتحبك علي تفاصيلها اللي تخصها هي لوحدها و اللي ماحدش هايقولك عليها و لا حتي هي ، لكن هاتسيبك انت تكتشفها بنفسك و تحاول تشوفها صح من جواها ، و ده مش هايحصل ألا لو شغلت ” مشاعرك ” معاها مش عقلك ( و دي وجهة نظر مش اكتر ) .

البنت اللي بتقرر تديلك ” قلبها ” بكامل أرادتها هي بالفعل أديتلك أغلي ما تملك و دي حاجه لازم تفهما و تقدرها و تفضل دايما فاكرها ، و معني انها أختارتك انت عن دون مخاليق ربنا يعني شافت فيك انك تستهال و هتبقي محتاجه منك طول الوقت زي الشاطر انك تثبتلها فعلا انك تستاهل ؛ الحقيقه انا ماعنديش مانيوال اديهولك يقول لك تعمل أيه او تتعامل معاها ازاي لكن فيه ثوابت.

تعالى لما أقولك ..

ايه أهم شي بتدور عليه البنت اللي بتحبك؟

أحساسها “بالأمان” معاك ، و الأحساس ده هو المفتاح اللي من غيره لو وقفت علي دماغك مش هاتفتح لك قلبها و هيبقي صعب عليك تكسبها او تتعامل معاها او تفضل معاك من أصله .

صدقني احنا اللي فاهمين غلط ان ساعدتهم شي صعب ، البنت اللي بتحبك بجد هتلاقيها مبسوطه معاك بأبسط الأشياء حتي لو جيبتلها قهوه و شغلتوا مزيكا بتحبوها و فضلتوا تلفوا بالعربيه ، الفكره كلها انك تسعدها بالطريقه اللي هي بتحبها مش باللي انت بتعرف تعمله و أبذل حبه مجهود و أعملها الحاجه  بأحساس و من قلبك فعلا .

الواقع أنهم لما بيحبوا بيبقوا طيبين الطيبه اللي بتوصل لمرحله ” الهبل ” أسترجل انت بقي و ماتحاولش تتستغل ده أبدا ، خليها تسمع كلامك بدافع أنها بتحبك لكن ماتؤمرهاش ، ما تتحكمش فيها ، ماتلغيش شخصيتها ، و ماتعندش معها لمجرد العند مش بخوفك بس هم في العند وحشين قوي ، و في فرق بين واحده بتعمل لك اللي انت عايزه عشان ترضيك و واحده بترضيك عشان بتحبك ؛ هاواجهك و اواجه نفسي بالحقيقه اللي بتوجعنا ان رجاله كتير فاكرين أنهم مسيطرين و الحقيقه أنهم ” غلابه قوي ” ، عايز تسيطر هي طريقه واحده مالهاش تاني سيطر “بالحب و بالاحترام” و أهم شي تبني عليه علاقتك بيها هي ثقتك فيها و ثقتك في نفسك انت الأول .

أعظم مكان ممكن تديهولك واحده في حياتها أنها تلجألك وهي متضايقه او عندها مشكله  ؛ و هنا هي مش محتاجه خبرتك العظيمه و قدرتك الرهيبه علي حل المشاكل و لا جايالك عشان تقولها أنها غلطانه .. تعرف تسمعها و انت ساكت ؟! شكرا.. ، أسوء شي ممكن تعمله لواحده بتحبك انك تستهتر بمشاعرها او بأحساس مضايقها او بمشكلتها حتي لو – تافهه – من وجهة نظرنا كجنس عميق ، سيبها تدلق عندك كل اللي جواها من غير نقد و لوم و حساب و عتاب و هتكتشف انك حلتلها جزء كبير من مشكلتها ؛ أتعلم تخليها هي اللي تحب تيجي تحكيلك تفاصيل حياتها من غير ما انت ” تقررها ” ، و أتعلم تخاف عليها من غير ماتخوفها منك.

غريزه ” الأمومه ”

ارجوك أستوعب معايا النقطه اللي جايه دي غريزه ” الأمومه ” اللي جواهم بتخليها لما تحبك بجد تتعامل معاك و كأنك أبنها ؛ يعني أهتمامها الزياده بيك مش لازم يخنقك و ماتتضايقش لما تزن عليك عشان تعرف مالك او حتي تتخانق معاك عشان مصلحتك كل دي ” أفعال حب ” ، لو فهمت ده كل ردود أفعالك أتجاه تصرفاتها هاتتغير ، حاسسها دايما ان وجودها فارق في حياتك و ان ليها دور فيها و انك بتقدر تعتمد عليها.

من فضلك ..

البنت اللي بتحبك مش هي الوسيله اللي تفرغ فيها طاقتك السلبيه و ضغوطتك في الحياه ، غير أنها مالهاش ذنب هي كمان عايشه معاك علي نفس الكوكب يعني عندها ضغوطاتها و مشاكلها و طاقتها السلبيه هي كمان ، و ساعات بيبقي ضغوطاتهم أكتر و لكن للأمانه قدرتهم علي التحمل أعلي مننا بكتير و ممكن تشيل ضغوطتك و ضغوط عشره زيك بس احنا بنسوق فيها ؛ نصيحه لو عشان بتحبك بتعديلك كتير بلاش – تتجاحد عليها – عشان في لحظه ما هاتقرر تسيبك و تمشي هاتمحيك من حياتها و كأنك لم تكن و هاتبهرك أنها بقيت واحده تانيه ، عموما هم مابيوصلوش للمرحله دي غير بعد كتير قوي ف ” الحق نفسك”.

لو بقت بتتوقعك او بقيت مألوف بالنسبالها  “هاتمل ” ، و الملل بالنسبالها هو بداية النهايه في علاقتها بيك و مش هاتعرف تبقي معاك نفس الأنسانه اللي انت حبيتها فأتعلم تكسر الروتين و شغل دماغك و حاول تبقي كيريتيف شويه و ماتسيبهاش توصل للمرحله دي.

أبعد عن الحاجات اللي بتتكسر عندها و مابتتصلحش.

في بدايه علاقتها بيك هي هاتديك ثقه مطلقه و هتصدقك و كأنك بني أدم معفي من أرتاكب الأخطاء ، ابعد عن الكدب و الأهمال و الخيانه و اي حاجه تهد ثقتها فيك ، و حاول ما توعدهاش و عود مش هاتعملها و في علاقتك بيها دايما ” يا تخليك قد كلامك يا تخلي كلامك علي قدك ” ؛ ماتسألنيش ازاي بيحسوا اننا بنكدب او بنخون او أتغيرنا او مشاعرنا حتي قلت بدون أي أعراض ظاهره عليك مهما كنت صايع.

عايز تحافظ عليها؟

تقبلها و حبها زي ما هي و أنسي مفهوم انك تعمل اللي انت عايزه لكن هي لا و اللي ماتقبلوش علي نفسك ماتقبلوش عليها ، و أنسف من دماغك فكرة انك عايزها طول الوقت حلوه و ” فيت ” و مهتمه بنفسها و انت مع أحترامي ليك بكرشك ده ، المساواه في الظلم عدل ! .

هم مش ” نكديين ” و لو فضلت شايفها كده هاتقفل منها ، لكن لو فهمت انها مجرد مشاعر متلخبطه جواها علي خوف طبيعي هم دايما حاسين بيه و في الغالب كل الحكايه انها محتاجه انك تطمنها – هم علي طول محتاجين يطمنوا – هاتعرف تتصرف ، و خلي بالك من مشاعرها المتقلبه طول الوقت بطريقه هاتخضك و بتخضها هي نفسها احيانا ، حاول تدور علي مشاعرها الحقيقيه اللي مستخبيه ورا كلامها اللي غالبا لا يعبر عن اللي جواها ، لا أخفيك سرا أنها ممكن تقولك ” بكرهك ” و من جواها بتحبك عادي ، و ما تتعملش معاها أبدا علي أنها منطقيه في أفعالها لان تصرفاتهم و ناقيضها ممكن تكون غريبه بالنسبالنا بس طبيعيه جدا بالنسبالهم .

ركز بقي في دي كويس – كرامتك كراجل – دايما من كرامتها ، لما تلاقيها بتغير من واحده بعينها احترمها و بلاش ترضي غرورك علي حساب مشاعرها ، و ماتحاولش تقلل منها او تصلح لها غلطاتها او تقول عيوبها قدام الناس .. الأحترام عمره ما بيمشي أتجاه واحد.

علي عكس مانت فاهم الحب الزياده و الحنيه و الرومانسيه المفرطه  و – التلزيق – هايقلبوا ضدك ، عشان هي بردو بتحب تحس انها مسنوده علي راجل يقدر يشدها من أيديها قبل ما تقع مش حيطه ضعيفه لو أتسندت عليها تخدها و تقع .

لو اللي بتحبك فقدت في حياتها أب او أخ او شخص كان بيمثلها شي مهم  و لما جيت حضرتك حطيتك هي مكانه ، أستعوب انك هاتقوم بكذا دور و أنها هتحتاج منك معامله مختلفه و مجهود أكتر من اي واحده غيرها و أفهم بردو انك حاجه كبيره عندها.

في بعض الأحيان هاتحتاج تتعامل معاها و ده لمصلحتك بمبداء ” لو جالك الغصب أعمله بجميله ” ، و حاول تشوفلك طريقه تحببك في مشاويرها ؛ بص لما تلاقيها أشتريت حاجه و فرحانه بيها و بعدين جت تقولك تعالي معايا نروح نرجعها روح و لو أتضريت تتخانق مع الراجل أتخانق .. لكن أياك تحاول تفهم منها ليه ؟! ، و عموما هم بقوا عاقلين و بيحلقولنا في الحاجات دي من نفسهم.

هي مش هاتضايق منك لو ماعملتش الحاجات دي بس هتنبسط جدا لو عملتها.

انا عارف اني اللي هقولوا ده صعب علينا كرجاله قوي ، بس و انتم داخلين او خارجين من مكان أفتحلها الباب او أفتحلها باب العربيه مره من نفسها يا سيدي ،  لو انتم في مكان و لازم تقوموا تجيبوا بنفسكم حاجه تشربوها او تاكلوها – رجولتك – بتحتم عليك انك انت اللي تقوم لكن بردو حاسسها انك انت اللي حابب تعمل ده ، و لو سمحتوا يا جدعان ” الست ” بتمشي جنب الراجل او قدامه مش وراه نهائي ، معلش حاول تضحي بخمس ثواني من وقتك الثمين و انت مشغول و أبعتلها ” مسدج ” بدون اي مناسبه حتي لو فيها كلمه واحده بس حلوه ، الكلام بيفرق معاهم حتي لو كل أفعالك بتثبتلها بالدليل القاطع انك بتحبها ؛ تعبيرك عن مشاعرك ليها لا ينتقص من رجولتك شي (سيبك من العقد دي ) ، و واقعيا من حقها عليك انها تبقي في بالك دايما ، الحقيقه العلميه بتقول انك لو عرفت تخليها مبسوطه و بتضحك في العادي هاتحبك ، بس لو عرفت تعمل كده و هي متضايقه ” هاتشد كرسي ” و تقعد جوه قلبها.

لمعلوماتك حاجات زي دي ممكن تفضل شيلاهالك سنين و تناسيها بلاوي انت عاملتها.

و أسمع مني ..

و بلاش تبقي من ” العبط ” اللي فاكرين ان الحب اللي بجد بيروح و يجيي و لو ضايعناه من أيدينا مره ممكن نلاقيه في حياتنا تاني ، لما تقابل حد بيحبك بجد بدون مقابل و من غير شروط و علي اي وضع أمسك فيه ، رزقك مش هاتاخده في الدنيا فلوس بس ، رزقك متوزع علي حاجات تانيه في حياتك من ضمنها البنت اللي بتحبك ، و زي ما بتهتم بشغلك عشان تترقي و تكبر فيه أهتم بعلاقتك بيها عشان اللي ما بينكم يكبر و توصلوا لمرحله أعلي في علاقتكم ببعض ، الحب زي اي نعمه ربنا بيدهالك لو ماحفظتش عليها هاتروح.

ونصيحه من قلبي

أوعي تكسر قلب واحده بتحبك او تدوس علي مشاعرها و خاف من انك تشيل ذنبها عشان دول حقهم – ربنا – بيخلصه مننا في الدنيا قبل الأخره .. و انت حر !!

فيديو مقال البنت اللي بتحبك ” رزق “

كيرو راجي

كيرو راجي

كيرو راجي شاعر غنائي مصري مواليد 1987 تخرج من اكاديمية الفنون ( المعهد العالي للموسيقي العربيه ) و له اعمال في كتابه السيناريو و بعض المقالات.