<جوجل اناليتكس>
الرئيسية / قضايا مجتمعية / بطالة / عاطل بحجة مفيش شغل .. مقال #باللهجةـالمصرية

عاطل بحجة مفيش شغل .. مقال #باللهجةـالمصرية

اكتر حاجة تلاقيها فى بلدنا العزيزة مصر هى القهاوى اللى قربت تبقى اكتر من البنى ادمين اللى عايشين فيها روح اى قهوة كده وشوف كميه الشباب اللى قاعد عليها بغض النظر عن الفئة القليلة برضو اللى بيشتغلوا بس بيعتبروها تغير جو هتلاقى كمية شباب كتير جدا عاطل والحجج مختلفة ..

طب تعالى احكيلك حكاية ..

مصطفى شاب مصرى فى اواخر العشرينات ذاكر ونجح واتخرج من كلية التجارة بتقدير امتياز كان عنده احلام كتير جدا بس كلها اختفت مع الزمن قرر يشتغل بشهادته اللى غير معترف بيها فى سوق العمل نظرا لاننا عايزين خبرة ايوه يافندم احنا عايزينك حديث التخرج ومعاك خبرة متسالناش ازاى هو الاعلان بيقول كده !!

من انترفيو للتانى ومن شركة لمكتب محاسبة اللى يقوله لا مرفوض واللى يقوله انت متنفعش محاسب بس تنفع سليز واللى يقوله اشتغل من غير مرتب وخد خبرة هرى كتير والنتيجة واحدة مصطفى زهق وقاعد على القهوة عشان مفيش شغل وبطل يدور بقا عاطل واللى يساله يقوله اعمل ايه ماهى ظروف البلد كده ..

فى نفس السنة اتخرج مع مصطفى محمد اللى كان تقديره اقل من مصطفى شويا ده نظرا لانه مكانش فارق معاه غير انه ياخد الشهادة ويبقى اسمه مؤهل عالى لانه طول عمره عنده موهبة حلم كان عايز يوصله محمد بيحب شغل الجرافيك جدا وطول فترة الدراسة كان بيدرس جرافيك اون لاين ودور وعلم نفسه بنفسه فى اللى بيحبه ده لانه بيحبه اول مااتخرج بدا يقدم فى اللى بيحبه وعمل انترفيو فى شركات تقدر موهبته اللى فعلا كانت بالقوة اللى تقبل بيه شركة من اكبر شركات البلد ده غير انه كان بدا يشتغل اون لاين مع شركات برة مصر ونجح ..

فى مشهد تانى ..

مصطفى ومحمد الاتنين قاعدين على نفس القهوة الاول لانه فاضى وطول الوقت بيلعن حظه اللى خلاه يتولد فى بلد مفيهاش شغل ومش مقدرة شهادته والتانى ماسك موبيله بيدور على فكرة جديدة يطبقها فى شغله ده لانه مش فاضى بس مبسوط جدا ..

الاول شاف انه عمل اللى عليه لمجرد انه راح كام شركة واترفض ..

التانى سعى عشان يوصل للى عايزه لانه مؤمن جدا باللى بيحبه ..

ربنا بيقولنا اننا نسعى وهو هيرزقنا على اد سعينا وتعبنا وان فى فرق شاسع بين اننا نتوكل على ربنا واحنا بنتعب واننا نتواكل على ربنا ونقعد على القهوة ونستنى الرزق يجى لحد عندنا ولما مايجيش نقول اصل ربنا عايز كده ..!

المصيبة ان فى شباب كتير اوى متواكل على ربنا ومستنى الشغل الفظيع اللى هيجى لحد عنده وده طبعا بيخلى القهاوى تكتر لان عدد الشباب بيكتر ولازم يكون فى مكان ليهم يلعنوا حظهم فيه براحتهم ..!

فى كل دول العالم الشهادة شئ اساسى لكنه مش كافى انك تشتغل فى مكان كويس تنجح فيه انت لازم تحب الحاجة اللى انت عايز تشتغلها عشان تنجح فيها وتطور نفسك فيها مع الوقت عشان توصل للى بتحلم بيه .. كلنا عندنا احلام كتير بس فى فرق كبير بين اللى بيحلم ويغطى وشه ويكمل نوم وبين اللى بيحلم ويقوم من السرير يتعب عشان حلمه !

السؤال بقا انت تحب تبقى مين فيهم محمد ولا مصطفى ولا انت عندك رأي تانى ؟؟!

فيديو عاطل بحجة مفيش شغل

 

عن منة الله جابر كمال