<جوجل اناليتكس>
الرئيسية / مشاعر / الملل العاطفي – مقال #باللهجةـالمصرية

الملل العاطفي – مقال #باللهجةـالمصرية

الموضوع ده من المواضيع اللى بتحيرنى جدا عشان كده قررت النهاردة انى اتكلم فيه معاكم وكالعادة ده رايئى الشخصى ومش بخص ولا بمثل اى حد إلا نفسى ..

هو إيه الملل العاطفى وإيه أسبابه وازاى نتجنبه ؟؟ هو احنا ينفع أصلا نتجنبه ؟! 

الملل العاطفى هو اللى بيصيب اى علاقة حب سواء ارتباط او خطوبة او جواز وبيكون من احد الاطراف وأوقات كتير جداً بيكون متبادل وده بيخلى فى فتور بينهم ونفور من بعض وبيوصل احياناً أنهم يبدوا يهربوا من بعض مش طايقين بعض مش عايزين يتكلموا وأوقات كتير كمان مش عايزين يشوفوا بعض .. بيزهقوا من بعض ويبدا كل واحد فيهم يدير وشه وينفخ ويبدوا يخرجوا ويدورو على ناس تانية !!

طب إيه الأسباب اللى بتوصل أي علاقة لكده .. 

من رأي الشخصي إن فى عدة أسباب :

* فى بداية اى علاقة بيكون عندنا الشغف، اللهفة والمشاعر الكتير المتخزنة جوانا وبالذات لو العلاقة دى كانت اخدت وقت طويل عشان تبدا او مكنش فى حد فى حياتنا لوقت طويل فنبدأ ندى بزيادة كل حاجة عندنا بتبقى كتير اوى ..

عندى إيمان قاطع إن المشاعر دى عاملة زى زجاجة الميا اللى لازم نشرب منها حبة فى حبة لأننا لو شربناها مرة واحدة بتخلص ووقتها هنعطش ومش هنلاقى اللى نشرب منه مشاعرنا كده بالظبط انت لو اديت كل اللى عندك مرة واحدة هتخلص وهايجى وقت تدور على مشاعر جواك تديها مش هتلاقى هتفضى

مشاعري غالية أوي

من وأنا صغيرة وأنا ماشية بمبدا ان مشاعرى دى حاجة غالية اوى ميننفعش اهدرها على اى حد عشان كده كنت برفض الدخول فى اى علاقة  وكنت مؤمنة انى لسا معنديش الوعى الكافى انى احافظ على قلبى وكان عندى إيمان اكتر انى لما فى يوم هقابل الشخص الصح هيحرك مشاعرى من غير اى مجهود منى ( وقد كان ) وبرغم فشل تجربتى بس انا لسا مؤمنة بالمبدا ده جدا ..

* الكلام الحلو المبالغ فيه اللى بيبقى زيادة اوى مفيش مانع انكم تقولوا لبعض وحشتنى او بحبك او اى كلام حلو بس ( تخيل كده معايا لو مش بتقولوا غير كلام حلو هيخلص هتسكتوا طب ايه الزهق ده هتملوا هتقفلوا هتعملوا كده تانى وتالت لحد ماهاتيجى لحظة هتهربوا فيها حتى من الكلام مع بعض ) وبرضو فى حاجات تانية كتير تقدروا تتكلموا فيها احكوا حياتكم تفاصيلها المواقف الهبلة اللى بتحصل حتى لو تكاد لا تذكر اتكلموا كتير الكلام ده هيخليكم تعرفوا دماغ بعض هيخليكم تحكموا على بعض كويس هيخليكم تبقوا واثقين من قرارتكم مش معنى كده انى بقولكم اتكلموا ليل نهار لا بس الوقت اللى تتكلموا فيها اتكلموا بجد ومفيش مانع من شوية حب وخلى ليكم اسم تنادوا بعض بيه اسم مجنون تعقدوا تضحكوا عليه وانتوا بتقولوه لبعض

* ده بينقلنا على الحاجة التالتة بلاش تبقوا مع بعض ليل نهار وتقفلوا حياتكم على بعض فى كتاب علاقات خطرة لدكتور محمد طه  بيتكلم فيها عن علاقة اسمها علاقة الحبل السرى ان الاتنين اللى بيحبوا بعض بيقفلوا على بعض لدرجة انهم بيدبوا فى بعض بتدوب ملاحمهم بيقفلوا على بعض مبيكنش فيه صحاب ولا اهل ولا اى حاجة هما الاتنين وبس لحد مابتيجى اللحظة اللى بيتخنقوا فيها ويبدوا ينفروا من بعض ..

عشان كده خلى عندكم المساحة انكم توحشوا بعض فيها خلى عندكم المساحة اللى اول ماتشوفوا بعض تقعدوا تحكوا فى كلام كتير متخزن خلى عند كل واحد فيكم مساحة شخصية بعيد عن التانى فيها حياتك صحابك الاماكن اللى بتحبها حلو جدا اننا نشارك كل تفاصيل حياتنا مع الناس اللى بنحبهم بس اللى مش حلو اننا نختفى وملامحنا تبهت لانه هايجى وقت نزهق ونحاول نرجع لنفسنا مش هنعرف .

* كل انسان فينا ربنا خلقه فيه الحلو والوحش ومع الايام والتربية بتبدا تتكون فينا الشخصية والطباع والافكار والعادات والحاجات دى كلها من اخطر الحاجات اللى بيقع فيها اى اتنين انهم يغيروا من بعض او يحاول شخص فيهم يغير التانى وده نتيجة التوقع وانت برة العلاقة بتبدا تشوف الشخص اللى قدامك من بعيد فتبتدا تتخيل وخصوصا لو انت عندك احلام وصفات معينة بتدور عليها فلما بتقرب بتلاقى ان الشخص اللى قدامك ده عادى جدا شبهك فيه حلو ووحش بس مش بتلاقى فيه الحاجة اللى انت بتحبها فبتبدا تغير فيه المشكلة الاكبر تكمن لو ان الشخص ده سمع كلامك عشان بيحبك مثلاً واتغير بعد شوية وقت هتمل وهتبدأ تحس انك مش عارف الشخص ده وهتبدأ تقوله كلام زى انا حاسس انى معرفكش زى الاول او مش انت اللى انا حبيته انت اتغيرت مع انك انت اللى غيرته بايدك فتبدا تبعد وتمل .

تعالوا اقولكم حدوتة، انا اصلا بحب الحودايت …

من شوية سنين كده مش كتير كان فى ولد بيحب بنوتة جدا بس حب من بعيد لسا من طرف واحد بيحاول يبقى قدام عينها كتير برغم انه مش بيكلمها كان عامل زى ضلها لمده 6 شهور خلال الفترة دى الولد اقتنع انه عرف عن البنت كل حاجة وانها هى دى برغم انهم كانوا 17 سنة تقريبا وانا طبعا ضد اى ارتباط فى السن ده مش موضعنا المهم قرر الولد انه خلاص لازم البنت تعرف البنت دماغها صعبة شويا شخصيتها قوية جدا وعنيدة الولد مكنش عارف هى هتوافق ولا لا .. الولد ده كان وسيم جداً طويل عيون خضرة وشعر بنى حاجة كده ملونة ماشاء الله والبنوتة كانت برضو حلوة عيون سودا وشعر اسود وضحكة تاخد العقل الولد خلى واحدة من صحابه تتوسطله مع وفعلاً البنت راحت كلمتها وعرفتها انه بيحبها جداً وانه عايز يقعد يتكلم معاها طبعاً البنت لأنها ذكية جداً كانت واخدة بالها طول فترة الست شهور من الولد الفكرة ماكنتش كده قد انها قالت كده بالنص : الولد ده اول مرة عرفوه عليا بصلى بصة انا مش بحبها كانه كان بيتفحصنى وعشان كده سلامى كان فى منتهى قلة الذوق وهو طلع من النوع اللى بيحب ياخد على دماغه المهم عدت الايام والولد بيحاول مع البنت راح كلم كل صحابها وصحابها طبعا متوصوش يابنتى ده الولد وسيم اديله فرصة يعنى انتى هتخسرى ايه هننزل كلنا مع بعض المهم عشان مااطولش عليكم الحدوتة   الولد والبنت نزلوا وقعدوا مع بعض كان كويس جداً بس كان فيه حاجة غلط كان كويس بزيادة زى مااتفقنا ان البنت كانت ذكية فعشان كده كانت عارفة ان مفيش حد كويس بزيادة بس فيه حد قعد يدرس فيها ست شهور عشان يبان كويس بزيادة طلب منها تديله فرصة عشان يثبت انه بيحبها والبنت وافقت لانها كانت عارفة انه هيفشل وقد كان الولد فشل فشل ذريع لانه بعد ماوصلها زهق هى كانت حلوة اوى وهى بعيد لما قرب مل فين بقا المغامرة ؟؟!

بس القدر كان عنده خطة تانية خالص او يمكن درس برغم ان الحدوتة دى مااعتقدتش شهر بس البنت دى فضلت معلمة فى قلب الولد برغم ان هو اللى زهق بعد شوية وقت البنت حبت وارتبطت والولد فضل بيحاول مش قادر كان كل مايرتبط ببنت تكون على اسمها او شبهها لحد مااتخرجوا وكل واحد راح فى سكة بس الولد مااقدرش كان كل شويا يحاول معاها عايز يتقدملها والبنت كان على لسانها كلمة واحدة : ده بيحبنى حب امتلاك حب البيبى اللى عايز لعبة ومش عارف يوصلها او اول مايوصلها هيهملها ويرميها الولد لاقى انه مفيش مفر فخطب بنوتة حلوة بنت ناس جميلة وبعد كام شهر البنت بدأ شكلها يتحول لصحبتنا اللى كان بيحبها من الاول خلاها اتحجبت وتلبس الطرحة زيها خست لان صحبتنا اللى كان بيحبها كانت رفيعة شويا حتى اللبس بقا نفس الشكل وكانت النتيجة صدمة لكل اللى يعرفوهم المشكلة مكنتش فكده المشكلة الاكبر كانت انه فسخ خطوبته برضو المشكلة الاكبر ان البنت ثارت وكلمت صحبتنا اللى كان ولا فارق معاها كل ده اصلا ….

متهيألي الرسالة وصلت 🙂

* عدم الصدق مش هاقول الكذب بس هاقول انك تخبئ ده من الحاجات اللى بتعمل ملل عاطفى انك تكون انسان غير واضح غامض بزيادة، انا مؤمنة جداً ان اى اتنين بتكون فى بينهم علاقة لازم يكونوا واضحين بزيادة لان من حق كل واحد يكون عارف التانى كويس ده من اسس العلاقة السليمة اننا لما نقعد مابعض نحكى كل حاجة حتى لو هبلة حتى لو مجرد شوية افكار وتخاريف وطبعاً رد فعل الشخص التانى فانه يحتوى الموقف ويسمع ويفكر كمان حتى لو حاجة هبلة .. الغلطة اللى بيقع فيها ناس كتير هى التحدى زى انا تعبانة جداً على فكرة انا كمان تعبان اكتر منكِ انا زهقانة جداً انا كمان زهقان اكتر منكِ وهكذا انتوا فى علاقة الطبيعى فيها انكم بتكملوا بعض مش بتتحدوا بعض على مين اكتر .

* الزن والنكد

انا هختصر الاتنين مع بعض لان دايماً الزن الكتير بيكون نهايته النكد وهما الاتنين صفتين مرتبطين دايماً بالمرأة مش فاهمة ليه الصراحة برغم انى اعرف رجالة كتير فعلاً فيهم الصفتين دول جداً المهم فى نوعية من الناس عندها مبدأ الوصول مهما كانت الطريقة فيبدأ الزن بكل الاشكال والانواع ودايماً الطرف التانى بيقول حاضر وخلاص برضو مش عارفة السبب الصراحة بس ده اللى بيحصل وهكذا وطبعاً لما مفيش حاجة تحصل يبداً النكد بكل الاشكال والانواع ابتداءً من قلب الوش وحتى الانعزال او الخصام وطبعاً هتلاقى الطرف التانى بيحاول يصالح حلو وجميل بس كل حاجة وليها حدود هايجى وقت والطرف التانى ده هيزهق هيمل هيبدأ يكره القرب هيبدأ يكره حتى النقاش هيبدأ يكره التواجد هيهرب عشان يريح دماغه من الزن والنكد .

الشخصيات العنيدة

* نجى بقا لأهم نقطة ولعلها الاخيرة العند الشخصيات العنيدة دى من اسوء الشخصيات اللى ممكن حرفياً تتعامل معاها ده ان عرفت اصلاً هما دايما مقتنعين بنفسهم وبس رافضين لاى مناقشة من اى نوع مهما كانت وده بيخلى احد الطرفين يبدأ من الهروب من الدخول فى اى نقاش من اى نوع مهما كان تجنباً للعند وتجنباً اكتر للمشاكل اللى هتحصل بسبب العند ده فى حاجة اسمها الرائ والرائ الاخر يعنى انا ليا رأي وانت ليك رأيك واختلاف الرأي ده لا يفسد للود بينا قضية لازم دايماً يبقى فى المنطقة الوسط اللى بنوصل عندها ونبدأ نوصل لحل يرضينا احنا الاتنين مش هى كده ياما خلاص العند دايماً مرتبط بالتهديد الطرف العنيد دايماً بيلعب على حب الطرف التانى ليه بس احب اقولك نصيحة هايجى وقت والطرف التانى يزهق ولما يزهق هيدوس على قلبه وحبه عشان يشترى دماغه فبلاش العند وبلاش والتهديد وبلاش الاختيارات اللى بتخسركوا بعض وبلاش بلاش تلعبوا وترهنوا على حبكم لبعض لانى زى ماقولتكم احنا فى الاول والاخر بشر .

طبعاً فى اسباب كتير بس انا حاولت اعرض اهمهم، السؤال بقا

هو احنا ينفع نتجنب الملل العاطفي ؟؟!

اه طبعاً ينفع ببساطة اننا يكون عندنا شوية ذكاء عاطفى نعرف الشخص اللى قدمنا كويس ونفهم انه انسان زيه زينا بيحس بيتعب بيفكر بيزهق نحاول نحتويه فى وجعه فى مشاكله حتى لو من غير كلام نسيب مساحة للى قدامنا انه يتنفس بعيد عننا ده هيخلينا نوحشه ويرجع يدور علينا لوحده نفهم دايماً ان الحياة مشاركة مش تابع ومتبوع كل واحد فينا ليه دور بيعمله احنا بنكمل بعض نتناقش نوصل لحلول ترضينا كلنا واهم حاجة نفهم ان الحب مش سلاح بنرفعه فى وش الطرف الاخر عشان نجبره انه يخضع لينا .. خلى عندنا سياسة انى احط نفسى مكان اللى قدامى فى الكلام فى الفعل يعنى لو هطلب حاجة لازم اشوف انا لو مكانه هقدر انفذها ولا

( إذا أردت أن تطاع فأمر بالمستطاع )

خلي عندنا دايما حاجة جديدة نعملها افكار جديدة فى حياتنا عموماً اخرجوا ياجماعة امشوا فى الشارع بلا هدف كلوا ايس كريم وذرة اطلعوا برة الصندوق روحوا ملاهى سافروا فى حتة جديدة اعلموا اى حاجة غريبة اضحكوا .. اضحكوا كتير بلاش نكد خلى عندكم سياسة كسر النكد اول ماتلاقى الطرف التانى بدا يتعصب ضحكوه بوظ برستيج العركة بضحكة حلوة زاولوا فى بعض وخلاص هخليكو توم و جيرى فى علاقاتكم بلاش تحدى بلاش منافسة انتوا بتكملوا بعض ..

نصحيتي الأخيرة النهاردة

العلاقة اللى تستنزفك بلاش منها العلاقة اللى تاخد منك اكتر ماتديك بلاش العلاقة اللى تمحيك وتخفى ملامحك وتشوهك خسارتها مكسب العلاقة اللى الزعل فيها اكتر من الضحك دوس عليها اختاروا صح لان ده اختيار لمستقبل اختيار الغلطة فيه بتاخد من روحك كتير 🙂

فيديو مقال الملل العاطفي – مقال #باللهجةـالمصرية

شاهد أيضاً

حدوتة #لهجةـمصرية. بقلم: منة الله جابر كمال || موقع مقال

حدوتة #لهجةـمصرية

الحدوتة دايما غريبة لدرجة إنك ممكن تتوه فيها، مين قال إني اقدر ومين قال إنك …