اختلاف الوقت اللي احنا فيه دلوقتي عن زمان وظروفه ومشاكله خلت أحلام كتير من البنات تغير طريقها, فبعد ما كان سقف طموحات أي بنت هو اليوم اللي هتلبس فيه الفستان الأبيض وتبقى أم وخلاص على كدا ظهر من فترة نقدر نقول عليها كبيرة نسبيا أفكار جديدة رمت جملة.

“البنت ملهاش إلا بيت جوزها”

ورفعت شعار

“strong independent woman”

الشعار اللي بقينا نشوفه في كل حتة وقرب ينزلنا من الحنفية

فلو يرجع الزمن والأمر بإيد البنات كانوا غيروا اسم المسلسل الشهير بتاع سعاد حسني وأحمد ذكي من هي وهو لـ هي وهي.

“أبقي أعملي كدا لما تتجوزي”

وبغض النظر عن إن الشعار دا بيختفي أيام الامتحانات ولما المحفظة بتجيب جاز آخر الشهر, إلا إنه غير كدا بيفرض نفسه وبقوة مع وجود أحلام تانية بقت بتنافس حلم البيت والأولاد اللي أهالينا اتربوا عليها زي مثلا الشغل والسفر والشغل تاني والمشاريع الخاصة والدراسة برا البلد والشغل كمان مرة, وأحيانا بيبقى العائق الأول في حياة أي strong independent woman”” أصيلة هما الأهل, خصوصا لما يبقوا أهالينا أتربوا على جملة عظيمة جدا غير “البنت ملهاش إلا بيت جوزها” وهي “أبقي أعملي كدا لما تتجوزي” وكأنك هتتجوزي سوبر مان!, فأنتِ في المرحلة دي بتبقي بتكسريلهم جملتين أو خلينا نقول مبدأين من أهم مبادئهم التراثية اللي أتربوا عليها, أو بمعنى أخر “إنهم يدعون لدين جديد” بصوت عادل إمام.

أسباب ظهور الـ “strong independent woman”

والحقيقة وبكل الانحياز للبنات, فظهور المبدأ ده ارتبط جدا باللي بيشوفوه حواليهم, فلما تعرف أن تبع إحصائية أتعملت في 2017 إن مصر بيحصل فيها حالة طلاق كل 4 دقايق, واللي أوقات كتير فيها بتلاقي المرأة نفسها شايلة مسؤولية أطفال من غير مصدر دخل ليها, غير طبعا حكايات صحابنا المرتبطين والمخطوبين عن قصص مشاكلهم الرائعة اللي بيتخللها قليل من الحب, فبالتأكيد أي بشر هيقلق وياخد خطوة لورا ويفكر 100 مرة, فنقدر هنا نقول إن سبب من أسباب ظهور الـ “strong independent woman” هو نظرية الدفاع عن النفس ببناء شخصية مستقلة وتوفير ذمة مالية خاصة بيها لوحدها تقدر تتسند عليها, دا غير طبعا بقية الأسباب المختلفة واللي من أهمها إن دا حق لكل بنت وإنها حرة في المقام الأول عشان ماتشتمش بس.

حلم الفستان الأبيض وشعار الـ “strong independent woman”

ولكن عشان نكون حقانين ولأن طبعا الستات مابيعرفوش يكذبوا, فالحقيقة إن وبرغم كل الظروف المحيطة والأسباب اللي ذكرناها, إلا إن حلم الفستان الأبيض وشعار الـ “strong independent woman” خطين متوازيين مبيتعارضوش مع بعض, فأنتِ تقدري تشتغلي وتسافري ويبقى ليكي كيان مستقل في نفس الوقت اللي بتحققي فيه حلمك كـ زوجة وأم, ومش هدي أمثلة كلنا ممكن نكون عارفينها كويس لنماذج كتير عملت كدا ونجحت في الناحيتين، ولكن للإجابة على السؤال بتاع اختار حلم أي بنت بالبيت والفستان ولا أختار نفسي وكياني أقدر أقولك أختاري الاتنين بيتاخدوا مع بعض عادي.

الزتونة في الموضوع دا إنك تقدري تبقي “strong independent woman” و في نفس الوقت ماتتخليش عن حلم أي بنت بالفستان ومش كدا وبس لأ انتِ كمان تقدري تحققي الجملة التراثية المشهورة “أبقي أعملي كدا في بيت جوزك” لما تختاري صح ولما تختاري راجل مش أي حاجة مذكر كدا تيجي في سكتك.

فيديو مقال هي وهي