<جوجل اناليتكس>
الرئيسية / الحياة / قالوا إيه ؟ – مقال # باللهجه_المصرية

قالوا إيه ؟ – مقال # باللهجه_المصرية

من إهتم لكلام الناس إهتم ، ومن وضع كلام الناس أساس حياته اغتم ، فكلام الناس مش اكتر عتاب أو لوم لا بيقدم وﻻ بيضيف لحياتنا جديد .
كل واحد بيتكلم وبيحكم على غيره من وجهة نظره الخاصه يعنى عايز الكون يتغير على مزاجه ، لو خلينا كلام الناس يحركنا ويتحكم ف كل أفعالنا كان فيه حاجات حلوه كتير وقفت قبل ما تبتدى أو مكناش عملناها وكانت صح .
زى حكايه أبو النواس :

حكايه أبو النواس 

الراجل ده كان وزير حكيم وطيب وذكى والناس كلها كانت بتحبه علشان كان راجل صالح بيحب الحق وبسيط مع كل الناس بس ما بيسمعش كلام أى حد غير لما يقتنع او اللى شايفه صح بيعمله وده خلى كتير من الوزراء مع الملك ( ملك البلاد ) عايزين يتخلصوا منه ويقتلوه ، وف يوم عمل الملك إجتماع لكل الوزراء فكل الناس اللى يعرفوه ف اليوم ده حذروه من اﻹجتماع ده وفيهم اللى قاله اهرب بره البلاد لانك كدا كدا ميت ، وف الاجتماع قعد ابو النواس جمب الملك بدأ الملك الكلام وقال يا أيها الوزراء كل وزير فيكوا لازم يبيض بيضه وفعلا كل وزير كان مجهز بيضه تحت منه وطلعوها للملك إلا أبو النواس هنا بقى ادرك انه ميت ميت وفكر ف رد سريع علشان يفلت م الموت ، وبكل بساطه رد أبو النواس بعد ما صاح زى الديك يا ملك إزاى كل الفراخ دى من غير ديك ؟
ف ضحك الملك وقاله قدرت تهرب ياأبو النواس من الموت .

انت اللى بتعمل نفسك

، وانت اللى بتهدها ،انت اللى بتحكم على نفسك بالموت وزى ما تقول كدا انت اللى عارف كل مفاتيح مشاكلك ومبتحاولش تستخدمها ، وبتمشى بكلام الناس اللى ممكن تعيش بسببه فى نعيم او جحيم ، وعشان كدا مش الكلام بيبقى صح ولا كل الكلام غلط و قدامك تختار وانت اللى شايف حياتك تمشى ازاى؟ فحياه يقودها عقلك خير من حياه يقودها كلام الناس .
دور ع الحلول جوه المشاكل هتلاقيها جواها ، فأغلب مشاكلنا بنلف حواليها وحلولها أبسط ما تكون يعنى مثلا لو قلنا (( الشارع يفسد مايصلحه البيت )) دى مشكله ممكن ناس كتير تدور على حلها بطرق كتير زى الضرب أو عزل الطفل عن المجتمع نهائيا وناس كتير بتلجأ للحل التانى بس مش دايما بيكون صح ، بس الحل موجود ف المشكله ((البيت يصلح مايفسده الشارع )) مش الضرب او الانعزل عن الشارع .
المشكله التانيه اللى بتهدد كل المجتمعات العربية والإسلامية بصفه خاصه وهى العيشه الصعبه والاحباط عند شباب كتير فعلا العيشه بقت تزهق وكل يوم بيعد وحش بيجى الاوحش منه مش معنى كدا ننتحر بقى وخلاص علشان نهرب ، الحل بسيط (( من أعرض عن ذكرى فإن له معيشه ضنكا )) يعنى ضيق العيشه والرزق لو عرفنا سببهم هنحلهم بكل سهوله .
اصلح اللى بينك وبين ربنا وسيبك م الناس وكلامهم وتحكماتهم وما تشغلش بالك بحد هتعيش مرتاح (( ألا ليت الذى بينى وبينك عامر وبينى وبين العالمين خراب ))
يعنى لو بينك وبين ربنا عمار هتلاقى ربنا صلح كل علاقاتك باهلك وبصحابك وجيرانك ووﻻدك وزوجتك تلقائى من غير ماتحسبها .
بس طبعا وقبل اى حاجه لو كلام الناس بياذيك ما تأذيش انت حد بكلامك ولو مش عايز حد يجرحك ما تجرحش حد انت اول ، لو بدأت بنفسك دنيتك هتبقى احسن ومش هيفرق معاك كلام حد ، ولو هتتكلم على حد ما تستعجلش ف الحكم عليه وما تتتكلمش غير بالخير .

إنسى كتير …

الحياه ابسط من انك تحط فلان ف دماغك او تستنى ترد له الآلم او ترد الاساءه بإساءه زيها ، لو ردينا الاساءه بإساءه فمتى تنتهى تلك الإساءة .
دع الامور تمشى فى اعنتها … ولاتنم إلا وأنت خالى البال .

فيديو مقال قالوا إيه ؟ – مقال # باللهجه_المصرية

شاهد أيضاً

متى تنتهى هذه المعاناة؟ || بقلم: محمود شقريه || موقع مقال

متى تنتهى هذه المعاناة؟

ذكريات الألم  لماذا نتألم كل هذا اﻷلم ولماذا ترحل عنا كثير من ذكرياتنا الجميله ويبقى …