النت ومشاكل الحياة الزوجية – #لهجة مصرية

مشكلة من الصبح

– حبيبى ممكن تنتبهلى شويه وتسيبك من النت.
– ما اقدرش تعالي إنت فى وقت تانى اكون خلصت.
– الله يخرب بيتك يا مارك على اليوم اللى عملت فيه الفيسبوك، سودت حياتى وخدت منى الراجل والوقت.

– ايه الجنان اللى على الصبح ده، مارك ايه ونت ايه ده انت اتجننتى بجد، مال النت ومال اللى انت جايه عايزاه، ثم تعالى هنا هو لازم كل يوم تجرى فى شكلى وتقولى يا نكد على الصبح، ده بدل ما تصبحينى بكلمة حلوة وابتسامة تفتح النفس، لكن ازاى لازم كل يوم افوق على كلامك الدبش، يا شيخة كرهتينى فى العيشة والجواز أنا اللي استاهل أنا اللى جيبته لنفسي ما كنت عايش مبسوط حر، ارحمينى بقى وقولي يا صبح.

– الله يسامحك انا برده مش هارُد، اصل انت ظالم من يومك، لا بتقدر ولا بتفهم قلبك ده حجر مش بيحس، ياما حاولت الطف بينا الجو لكن اتضحلى ان مالكش فى الجو، حياتنا بقت مافيهاش مشاعر كلها شد في شد، ارحم يا شيخ واتغير دى العيشه معاك تقصر العمر.
– شوفي بقى كلامك ده كله مافيش منه فايده، فالاحسن تسكتى وتقومى تشوفى الأكل.
– اهو انت كده دايما همك على بطنك كله أكل في أكل، زهقتنى يا شيخ وكرهت حتى سيرة الأكل.
– برده مش هارُد لان ده واجبك يا سيت هانم افتكرى وبلاش كتر كلام ورغى.

– باقولك ايه يا حبيبى انا كنت جايه اطلب منك حاجه بسيطه ما كانتش محتاجه منك كل الهرى ده، اسمع وانت ساكت وهتنفذ من غير ما تقول لا، بص بقى واسمع وخليك هادى بلاش نرفزه وقلة عقل.
– اللهم طولك يا روح انت ليه لسانك كده دايما طويل، عايزه حاجه اطلبى بزوق وهتشوفى رد الفعل.

– ماشى يا حبيبى انا بقى زهقانه متدايقه والنفسيه تعبانه، محتاجه اللى يواسيها يدلعها يعيشها فى رومانسيه مالهاش حل
مثلا مثلا ورده حمرا كلمة غزل حلوه انشالله بيت شعر، او اغنيه من الزمن الجميل تدوب القلب، او تطلب منى رقصة فالس، او سهره حلوه كده على الشموع دى الليله نسمتها حلوه ترد الروح، واخدلى بالك انت يا حبيبى من الكلام اظن كله معقول وعين العقل، اوعى ترفض وتقول مش فاضى مشغول انا قاعد على النت.

– اه يا عين يا ليل وايه كمان يا ستى، قولى واشجينى على وتر القلب اعزفيلى، بعدين نتكلم انا مزاجى مقلوب امشى دلوقت
ولا اقولك استنى تعالى هنا قوليلى، وانت يعنى من امتى نفسيتك مش تعبانه، ده انت على طول بتشكى لطوب الارض، وعلى فكره بقى الشكوى لغير الله مزله، وانت عارفه انى ابرد من لوح التلج، يعنى وفرى كلامك انا مش باهتم.
– يعنى ايه بقى الكلام ده نازل شخط ورزع وخبط، ما تفهمنى انت عايز منى ايه بالظبط.

المشكلة تكبر بزيادة الكلام

– ماشى الكلام يا سيتى انا هاجيبلك من الاخر من غير كتر رغى، انا زهقت عارفه يعنى ايه زهقت، زهقت منك ومن عيشتك ومن نفسيتك اتخنقت، جيبتيلى العصبى زهقتينى من نفسى خليتينى عايز اهج، ده انت يا هانم مافيش يوم بيعدى الا لما تحبشيه بالنكد والغم، خليتى عيشتى خل مرعلقم وانت بارده مافيش عندك دم.
– يا نهارك اللى مش هيطلعلوا شمس كلامك كله سم فى سم، بتقول ما عنديش دم ما الحال من بعضه وانت اصلا معدوم الاحساس والدم، الله يلعن ابو اليوم اللى شفتك فيه ووافقت ورضيت بيك، الله يسامحك يا ابويا انت اللى شبكتنى الشبكه دى كانت شبكه سودا.

– الله عليكى يا جمال كلامك قولى كمان خللى السواد اللى جواكى يظهر ويبان، خليكى كده اهرى فى نفسك قولى وعيدى انا مش باهتم، روحى يا شيخه ربنا يريحنى من دى عيشه انا زهقت وطهقت، وشكلى كده هاتهور وارجع من تانى حر، طبعا فاهمه كلامى واللى وراه هتسكتى بقى، ولا تاخدى بعضك وعلى بيت ابوكى تجرى جرى.
– اه ده بقى تهديد صريح ماشى الكلام لما اشوف اخرتها ايه وياك، خليك انت عايش على النت اتبسط كمان وكمان وانا داخله اشوف الاهم، طبعا عارفه الاكل هم بطنك وبس.
– شاطره يا ست الستات فهمتى مختصر الكلام عيشى بقى وانت راضيه مش عايز تانى اى طلبات، وادى النت كمان قفلته انا داخل انام ومش واكل اكلك كمان ماسخ مالوش طعم اى كلام.

نهاية الكلام

راح قايم داخل اوضته ورازع الباب فى وشها، وهى واقفه متسمره فى مكاناها مزهوله بتضرب كف على كف، وتقول: “حسب الله ونعم الوكيل فيك يا شيخ، راجل ظالم ومفترى خساره فيك اكلى، ضيعت صحتى ووقتى عليك، واتاريك زى القطط تاكل وتنكر
ماسخ اكلى. اسمعوا ياناس، واشهدوا عليه، قال اكلى ماسخ ومالوش طعم بيقول البيه، اومال الكرش اللى ادامك ده من ايه ورم مثلا، منك لله يا شيخ إلاهي تنام ما تقوم ابدا، عشان ارتاح منك ومن ظلمك، مفتري ووشك يقطع الخميره من البيت.

فيديو مقال النت ومشاكل الحياة الزوجية

أضف تعليقك هنا

نهى هيكل

نهى هيكل