<جوجل اناليتكس>
الرئيسية / إسلام / صيام رمضان / يوم فى حياة زوج صائم – #لهجة مصرية

يوم فى حياة زوج صائم – #لهجة مصرية

صباح رمضاني

– صباح الخير يا اهل البيت.
– اهل البيت ايه؟ يا زوجى العزيز، مافيش غيرك وغيري، انت نسيت ولا ايه؟

– لا ما نسيتش يا ستى، بس احنا فى رمضان ما ينفعش اقول يا حبيبتى، اللهم انى صايم بلاش تطلعي نرفزتى.
– وانا قلت ايه يخليك تتنرفز بلاش تقفلى على الواحده خلى الشهر يعدى.

– ما هو يا ست الستات، ما ينفعش اقولك يا حبيبتى، انا صايم وانت صايمه فهمتى؟ ردي على الصباح من غير ما تجرى فى شكلى، قدرى انى صايم ولسه رايح شغلى.
-وانا قلت ايه عشان تدينى محاضره يعنى؟ فيها ايه لما تقول يا حبيبتى؟ يا عينى عليا وعلى بختى.

– اهو ده الكلام اللى بيجيب كلام ويقول للنكد شرفت يا صاحبى.
– انا نكديه برده الله يسامحك، يا عينى عليا وعلى غلبى، حرام الظلم ده احنا فى رمضان اجيب مين ينصفنى، فينك يا امى يا ضهرى وسندى.
– وليه بقى بتجيبى سيرة حماتى دلوقتى؟ خلى يومنا يعدى، اللهم انى صايم روحى شوفى شغلك وانا اروح شغلى.

– يعنى انت اللى بس صايم راعى مشاعرى.
– وايه دخل مشاعرك وسط الكلام يا ستى؟ اعقلى كده واهدى.
– قصدك ايه اعقل واهدى، مجنونه باكلم نفسى ولا باشد فى شعرى.

الصداع من كثرة الكلام 

– يا سيتى كفايه جر فى شكلى انا تعبت خلاص منك، جيبتيلي صداع مش مستحمل كلام فهمتى؟ سيبينى اروح شغلى انا الغلطان انى صبحت عليكى، استاهل كل اللى يجرالى منك.
– يعنى كنت عايز تروح شغلك من غير ما تصبح ولا حتى تكلمنى؟ يا عينى على قسمتى على نصيبى وبختى.

– يا ست ارحمينى كفايه رغى انا فرهدت خلاص منك. روحى شوفى هنفطر ايه الله يرضى عليكى خلى يومنا يعدى.
– اهو انت كده ما اخدش منك غير كلام يجرحنى ويزعلنى، اللهم انى صايمه قول عايز ايه على الفطار خلصنى.
-دى طريقة كلام يا هانم، ده انت صديتى نفسى اللهم انى صايم، طب روحى والله ما انا فاطر معاكى النهارده. جايلك يا ست الحبايب بشوقى يا ست الكل يا راحتى، ده حتى الاكل من ايديها له طعم تانى خالص مش اكلك انت.

– منك لله يا شيخ هتفطرنى اللهم انى صايمه.
– صايمه ايه؟ ما راح الصيام بسببك.
– صبرنى يارب وسامحنى ما كانش والله قصدى.
– استغفرى ربك وتوبى عن جر شكلى، ده شهر كريم افتكرى.

اعتذار

– حقك عليا خلاص ما تزعلش والله ما كان قصدى، الكلام جاب بعضه وانا ما قدرتش امسك نفسى. سماح يا اهل السماح ارضى وصالحنى.
– اهو ده الكلام يا ست الستات عاقله وفهمتى.

– هاستناك على الفطار اوعى ما ترجعش، احلى فطار فطار اهل بيتك هتشوف وهتشهدلى
والحلو هيكون عيش سرايا بالقشطه يا زوجى، هات صينيه معاك اوعى تنسى وما تجيبشى.
– اللهم انى صائم انا رايح شغلى.

نهى هيكل

نهى هيكل

شاهد أيضاً

النت ومشاكل الحياة الزوجية - #لهجة مصرية

النت ومشاكل الحياة الزوجية – #لهجة مصرية

مشكلة من الصبح – حبيبى ممكن تنتبهلى شويه وتسيبك من النت. – ما اقدرش تعالي …