بقلم: خلود محمود

فيلم يوم الدين 2018

الفيلم دراما بيحكي عن أحد مرضى الجذام المتعافين، عاش حياته كلها في مستعمرة الجذام لحد ما مراته هتموت وهيقرر يدور على أهله، وتبتدي رحلته لأول مرة برا المستعمرة وتعامل الناس معه.

الفيلم إنساني من الدرجة الأولى، وهيمس إنسانيتك وهيفكرك بمواقف كتير عدت عليك من غير ما تاخد بالك اتصرف فيها بشكل مش من المفروض تتعامل بيه.

وعلى الرغم من بساطة القصة ويمكن لوهلة تبدو تقليدية لكن في الحقيقة الفيلم مميز جداً سواء من الإخراج أو التمثيل، الإخراج فيه كان اكتر من ممتاز الكادرات واستخدام الرموز معينة علشان يوصلك الفكرة، والكادرات أغلبها مريح جداً للعين، والواقعية المتصور بيها الفيلم والكادرات صعب تحس انك بتتقرج على فيلم بقدر ما تحس إنك عايش في الرحلة والحالة معه، وحتى الموسيقى التصويرية موسيقى رحلة البحث كانت موفقة جداً لأحداث الفيلم، أما عن التمثيل وعلى الرغم من بعض الآراء اختلفت على الأداء إلا اني شايفة الأداء كان تلقائي جداً وطبيعي بدون تكلف أو انفعالات مفتعلة، ومن أجمل اللي اتقدمت في الفيلم بشكل غير مباشر هو الشكل الحقيقي للصداقة بين “بشاي وأوباما” على الرغم من اختلاف السن بينهم، والشكل اللي اتقدم بيه في الفيلم ينطبق عليها فعلاً مقولة (اختار الصديق قبل الطريق).

تقييم فيلم يوم الدين

• الفيلم من وجه نظري قوي لأنه قدر يوصل بيه لمهرجانات عالمية بممثليين غير محترفين أو نجوم كبيرة.
• الفيلم بطولة راضي جمال (بشاي) وأحمد عبد الحافظ (أوباما) وتأليف وإخراج أبو بكر شوقي.
• الفيلم معروض حالياً في أكتر من دار عرض، الفيلم يستحق فعلاً المشاهدة واننا نشجع أن يكون عندنا أفلام من النوعية دي.

بقلم: خلود محمود