البرمجة اللغوية العصبية (الجزء الأول) تاريخ البرمجة #مقال باللهجة_المصرية

فى البداية أحب أنبه أن هتكلم بلهجة مصرية (عامية) ودى تكون بداية ملف خاص بالتنمية البشرية ..
لقائنا الأول هيكون خاص بالبرمجة اللغوية العصبية ..
سمعنا كتير عن حاجة أسمها البرمجة اللغوية العصبية وناس كتير عايزة تعرف هو أيه حكاية البرمجة ؟؟

1-نشأة البرمجة اللغوية العصبية

كان في شخصين واحد عالم لغويات اسمه جون جريندر وطالب رياضيات وحاسبات اسمه ريتشارد باندلر الاتنين دول كانوا في جامعة سانتا كروز في كاليفورنيا في أمريكا الاتنين دول كان بينهم هواية مشتركة وهى ملاحظة سلوكيات البشر كانوا بيحبوا يتابعوا الناس وازاى الناس بتتصرف ومع الوقت جاتلهم فكرة أنهم يتعمقوا في الهواية بتاعتهم ويعملوا منها دراسة .

وكان عندهم مبدأ رئيسي بيقول :

اذا استطاع شخص فعل شيء يستطيع أى شخص آخر في العالم فعل نفس الشيء .. وكان أول دراسة ليهم طبقوها على شخص أسمه ميلتون إريكسون والراجل ده كان دكتور فى علم النفس التحليلى وكان مشهور جداً بنظام جديد عمله اسمه التنويم بالإيحاء وقال أن كل إنسان قبل ما ينام بيوصل لمرحلة اسمها الألفا من موجات المخ الزفير بيبقى أطول من الشهيق التنفس بيبقى أعمق العين بتتقل والإغريق زمان كان بيقول على مرحلة الألفا ((إله النوم)) .

نرجع تانى ونفكركم بـ جون جريندر و ريتشارد باندلر قعدوا فترة مع الدكتور ميلتون إريكسون بيدرسوا فيها شخصية ميلتون إريكسون استمروا معاه أكتر من سنة بيدرسوا فيها نبرات صوته وحدته وقوته وسبب نجاحه فى علمه .. فلم خرجوا من عنده بدأوا يكتبوا كتابين، الكتاب الأول كان اسمه structure of magic 1 والكتاب التانى اسمه structure of magic 2 بعد لم خلصوا كتابة الكتاب بعتوا نسخة لميلتون إريكسون مكنش متخيل أنه بيعمل الحاجات دى لأن كان بيعملها بتلقائيه علشان أصبحت برمجة عميقة فى العقل اللاواعى تلاقى نفسك لم تعمل حاجة أكتر من مرة وتربطها بأحاسيسك أصبحت فى العقل اللاواعى زى مثلاً نقطة العادات فى حياتنا سألت نفسك قبل كده هي العادة عبارة عن أيه ؟؟

العادة حاجة صعبة بتكررها أكتر من مرة لغاية لم تبقي سهلة طالما أصبحت سهلة أصبحت جزء من تجاربك ..
وتانى دراسة عملوها جون جريندر و ريتشارد باندلر كانت على فريتس بيرلز مؤسس علم الجشطلت لاحظوا أن نتائج الدراسة الى بيعملوها قوية جداً سواء كانت الدراسة دى على المختصين بعلم ما أو على ناس عادية، فـ جون جريندر ويتشارد باندلر أكتشفوا أنهم بيألفوا علم قوى جداً بدأوا يختاروا أسم للعلم الى بيألفوا قالوا : الإنسان من بداية وجوده فى الحياة وهو بيتبرمج فإختاروا لفظ البرمجة وبعدين قالوا طالما الإنسان عنده برمجة هيوصلها للناس بأيه ؟؟ هيوصلها للناس بلغة تبقى اللغوية، وبعدين قالوا هو مين الى بيتأثر الأول الجهاز العصبي تبقى ((البرمجة اللغوية العصبية)) NLP ..

2- يعنى أيه برمجة لغوية عصبية ؟؟ من هنا هنبدأ نوضح كل لفظ منهم لوحده 

1- البرمجة

هى مجموعة أفكارنا وأحاسيسنا وسلوكياتنا الى بتسبب نتايجنا وواقع حياتنا ..

2- اللغوية

بتاخد شكلين اللغة الداخلية واللغة الخارجية، اللغة الخارجية هى لغة الكلام، كان في شخص أسمه ألبرت مهربيان كان تخصصه فن الإتصال، وفن الإتصال ده كان بيتكون من فن الإتصال المسموع والغير مسموع .. قال أن اللغة لا تمثل أكتر من 7% وبعدين قال أن حدة الصوت ونبرة الصوت بتمثل 38% وبعدين قال تعبيرات الوجه وتحركات الجسم بتمثل 55% .. معنى كده أن أى كلام أنت بتقوله مش بيمثل غير 7% فقط، واللغة الداخلية فيها حاجة مهمة جداً فيها مبادئك وقيمك واعتقاداتك ووجهات نظرك للأشياء وأخلاقك ..

3- العصبية

 بتمثل الجهاز العصبي والجهاز العصبي بيستقبل المعلومات في البداية بعد كده بيعمل دورة أسمها الدورة الذهنية، والدورة الذهنية يطول شرحها هنتكلم عنها فى مقال خاص

3- هى البرمجة اللغوية العصبية جات منين ؟؟

أول ناس إكتسبنا منهم البرمجة الأب والأم بنسبة 90% من قيمنا من الأب والأم وبعد كده المحيط العائلى وبعد كده الإنسان يبدأ يختلط بالمجتمع فيبدأ يكتسب من الناس معلومات وأفكار جديدة فيبدأ يضيفها لبرمجته الشخصية ..
وبكده وصلنا لنهاية لقاءنا الأول الخاص بتاريخ البرمجة حاولت اتكلم عنها بإيجاز شديد وألقاكم على خير فى لقاءنا القادم الى من خلالها نبدأ عن ازاى نستغل البرمجة فى حياتنا ..

فيديو مقال البرمجة اللغوية العصبية (الجزء الأول) تاريخ البرمجة #مقال باللهجة_المصرية

أضف تعليقك هنا