التفائل هو الأمل في الحياه،النظرة المستقبلية الإيجابية لكل حاجة في حياتنا، التفائل هو النور بيخليك تكمل في الطريق للنهاية مهما كان صعب وطويل….. بيساعدك في انك تعيش حياه كلها بهجة….بيخليك تشوف كل حاجة مبهجة وسعيدة

التفائل هو منارة التقدم و راية النجاح……هو اللي بيخليك تدي ،تنجح،تتقدم….بيخليك مطمن بيخلي عندك حالة من الراحة النفسية والسكينة

، بيخلي ثقتك بالله تزداد

التفائل …ايمان بيؤدي  للانجاز …اصل مفيش حاجة ممكن تتم من غير امل وتفائل .

التفائل بيولد عندك اصرار ،عند،جرأة، شجاعة ،بيديك ثقة بالنفس، بيخلي تفكيرك دايما إيجابي ،بيعلمك الحب ،وبيسهل ليك النجاح ،بيمنحك القدرة  على التجديد وتذوق الجمال في آى حاجة حوليك ،بيخليك تحس بالقناعة وترضي بالقليل .

المتفائل  بيقدر يعدي مواقف ومحن كتير صعبة علشان عندة امل في بكرا أمل في أن اي حاجة وكل حاجة  مهما كبرت أو صغرت هتعدي

المتفائل….بيحس بطاقة عالية ..دايما مستعد يواجة ،يتحدى ،يكمل في اي طريق في سبيل انة يوصل لحلمةو لهدفة

المتفائل…بيستمتع بحياتة التفائل والنظرة الإيجابية بتبعد الشخص عن الأمراض النفسية والجسمانية ودا مش معناه خالص ان التفائل بيزود في العمر ولكن الشخص المتفائل بيعيش حياتة ويموت بصحة جيدة

#التفائل بيرفع مستوي استيعابك للامور اللي حواليك بيخليك بيعيد عن الأمراض النفسية بيضفي لمسة حلوة على حياتك ودا بيساعدك في مواجهة الضغوطات اللي حواليك وبيخليك تتعامل مع مشاكلك بطريقة اكتر فاعلية وسهوله

__التفائل حاجة موجودة من زمان في اعتقاد كان موجود في الحضارة الهندية القديمة  هو أن الشخص المتفائل عندة شمسين واحدة اللي بتنور الكون حوالية وشمس تانية في قلبة لما شمس الكون تغيب والدنيا من حوالية تبقي سودا. الشمس اللي في قلبة تنور قلبة وعقله وتخلي عندة قدرة انة يكمل طريقة للنهاية

_في ناس مش هيعجبها الكلام اللي فات بداعي انهاكلام كفار واعتقادات تنسب لحضارات كافرة

في نفس الوقت الناس دي هي اللي بتتدعي انها بتدافع عن الإسلام وبتنشرة. الناس دي دايما مصدرين التكشيرة في وشوش الخلق….. نفسي اعرف ازاي بيدافعوا عن الإسلام  وبيقتدوا برسول الإسلام 

والرسول صلّ الله عليه وسلم  كان دائم الابتسامة وجهة صلّ الله علية وسلم كان بيشع نور من كثرة تبسمة ….. وكان دايما يقول  (أحب الفأل الحسن)

وغير كدا كتير……

_مش بس في الحضارات والأديان السماوية وعند الفلاسفة وعلماء الكلام

لا …..في دراسات وابحاث اتعملت على اكتر من 100الف شخص في اماكن وظروف مختلفة …اكدت ان الأشخاص المتفائلين هم أقل عرضة للإصابة بالأمراض الجسدية والنفسية وأن التفاؤل بيمنح الشخص هدوء اعصاب في بعض المواقف اللي بيتاثر على تحسين علاقتة الاجتماعية باللي حوالية

___احنا فى الوقت الحالى فى امس الحاجة لوجود التفائل في حياتنا اكتر من الاول مع أن في الوقت الحالي الكلمة دي مبقتش موجودة في قاموس ناس كتير بقى منتشر في مجتمعنا ظاهرة النكد والتشائم وللأسف ظاهرة التشائم منتشرة اكتر بين الشباب الصغير

__مجرد انك تعرف تفرح لامور بسيطة حصلت دا في حد ذاتة انجاز  مش اى حد يعرف يعمله إلا شخص متفائل بيدور على آى حاجة تفرحة وتديله طاقة ايجابية

_ثقافة التفائل ليها تاثير إيجابي على الفرد والمجتمع شعور حلو انك تحس انك عايش حياه مفعمة بالأمل والتفائل بس الاجمل انك تنشر الروح دي

مجرد انك تنشر روح التفائل والايجابية في محيطك

مدرستك، شغلك،بيتك،بين صحابك،على السوشيال ميديا دا أحسن واعظم دور ممكن تقوم بية في يومك العادي

كام شخص ممكن يتاثر بكلامك …..كام شخص ممكن يغير حياتة للاحسن ووجهة نظرة السيئة في الحياه بسببك …بسبب كلامك عن الإيجابية والتفائل …

__انك تبقي مصدر للتفائل والإيجابية والأمل بالنسبة للناس دا شعور لا يضاهية شعور تاني في الدنيا كلها…….

اجمل شعور ممكن تحسة أن بكلامك اللي بتكتبة كل يوم على السوشيال ميديا او بتقوله حتي وانت بتتكلم مع الناس اللي حواليك …أنك اثرت في شخص كنت سبب انة يشوف الحياه بشكل احسن انة يغير وجهة نظرة المتشائمة  عن الحياه وبالتالي يغير حياتة للأحسن

احنا ممكن يبقى لينا دور إيجابي ومؤثر جدا  في المجتمع بحاجات بسيطة جدا ممكن نعملها. ومش هتاخد مننا وقت ولا مجهود بس هتفرق وهتأثر كتير ننشر الايجابية والتفائل والأمل صدقني هتفرق مع ناس كتير وأولهم انت هتفرق معاك جدا هتحس انك مرتاح اكتر واهو ع الاقل الناس هتفتكرك بيها ✋