سوف يمضي

بقلم رشا زهران

يحكي أن رجلا كان له صديق كثير الشكوى والقلق، خرج معه ذات يوم إلى المقهى كالعادة فجلس الصديق يشكو من همومه، “الاسبوع القادم تحتاج ابنتي مصاريف الدروس، بينما الاسبوع الذي يليه يجب أن أعطي ابني مبلغا لمشروع تخرجه، والشهر القادم عرس أخي الأصغر، وأنا كنت اقترضت منه مبلغ من المال وهو الآن يريده”.

بعد ثلاثة أيام كان الرجل يجلس تحت بيت صديقه كثير الشكوى، يتلقى عزاؤه مع ابنه واخيه … مات قبل أن يلتقي بأول همومه … أيها السادة إنها ليست قصة واقعية، إنها الواقع بنفسه .

انت متخيل قد ايه من عمرك بيضيع في هموم وقلق ممكن ميحصلش منهم حاجه، قلق أكل من وقتك وصحتك وحياتك، طيب متخيل اللحظة اللي حزنت فيها لو كنت عشتها بسعادة كانت هتفرق معاك إزاي مش بس معاك، و مع كل الناس اللي حواليك، امك ابوك أولادك، طيب عندك فكرة إن قلقك ده ممكن يكون هو السبب إن الحاجه اللي انت قلقان منها تحصل. زمان في الأمثال الشعبية قالوا: ” اللي يخاف من العفريت يطلع له “. فاكر كام مرة انطبق عليك المثل ده، وقلت لنفسك ” صحيح اللي يخاف من العفريت يطلع له “، طب عشت خوف وقلق من عفريت تاني ليه بعدها؟

أمراض القلق

للأسف مش بس العفريت اللي طلعناها لأنفسنا من القلق، الأمراض كمان ، الحموضة، قرحة المعدة، الخفقان، ارتفاع ضغط الدم ، نقص الوزن، الصداع المزمن، القولون العصبي، اضطرابات النوم، الاكتئاب، الفزع والرهاب.

كل الأمراض دي ممكن بكل بساطه تتجنبها لو قررت تتخلص من أي قلق، لو قررت تحط الحياة في حجمها الطبيعي، و تعرف ان القلق مش هيقدم بس احتمال كبير يأخر .. انت أولى بصحتك من المرض، سعادتك أولى بفلوسك من رحلة العلاج، اللي خايف منه لو حصل يمكن يكون أهون من الأمراض اللى هتحصل من قلقك وخوفك.

الخلاصة عيش ببساطة، واعرف ان الوقت ده مهما كان صعب، مصيره هيخلص، و هيبقى مجرد ماضي، المسألة مش صعبه، ولا هي خيال افتكر اخر مرة قلقت فيها، واللي قلقت منه محصلش، أكد لنفسك ان اللي انت قلقان منه مش هيحصل.

افتكر دايما ان الدنيا فترة مؤقتة، وأن منتهى السعادة فيها انك تعيشها كأنها رحلة وهتخلص .. املأ قلبك بربناو أكد لنفسك انه قريب منك، وقادر ينجيك من كل همومك، حتى لو مش بتمر بفترة قلق ديما أكد لنفسك احساسك بقرب ربنا منك عشان تتجنب اصلا فترات القلق.

بقلم رشا زهران

أضف تعليقك هنا