غفرانك ربي

 فى شاب أعرفه اتخانق مع صاحب الشغل بتاعه بسبب إنه مش عاوز يخليه يروح يصلى فى المسجد وقاله أنا مش همنعك عن الصلاة ؟ لكن الشغل عبادة وساعة الصلاة فى اوردرات كتير بتبقى مطلوبة — خلصها وابقى صلى مكانك — الشاب الجميل اللى شغال باليومية ده قاله ” تأكد إن الصلاة اهم من الشغل وإذا كان الشغل عبادة فالصلاة هى أول عبادة أنا هتحاسب عليها وكل اللى بعدها هيكون سهل — ومينفعش اطلب الرزق وأنا بسمع نداء اللى خلقنى وهو بيقول الله أكبر وملبيش – وفى آخر اليوم الشاب وهو بيتحاسب سابله تمن ساعة من يوميته وقاله ” دى عشان وقت الصلاة اللى كنت بمشى فيه ” !! وقاله جملة عظيمة جدًا
” سيدنا عبدالله بن ام مكتوم أعمى والنبى قاله طالما بتسمع الآذان ملكش عذر — أنا هقوله ايه وأنا بصحتى وعافيتى – وهيعذرنى إزاى !! أنا مش هطلب رزقى بمعصية ربنا :))
فى لحظات فى حياتك ربنا هيحطك فى اختبار حقيقى ” اختبار الصدق “
الإختبار ده هو ترمومتر الحرارة بينك وبين ربنا — زيادة إيمانك او نقصانه ’ صدق توبتك من عدمها — هتلاقى البنت اللى قررت متكلمهاش — بترن عليك فى نفس الوقت اللى اخدت فيه قرارك — هتلاقى اللحظة اللى قررت فيها تصلى فى جماعة !! الصاحب او الضيف اللى بيقولك يلا بينا نتفرج على الماتش — هتلاقى كل شىء حرام خدت قرار انك تسيبه بيجيلك بسهولة وبرغبة أشد ’ لحظة الإختبار دى مهمة ومصيرية جدًا فى تغيير حياتك فاوعى تفرط فى العهد اللى أخدته مع ربنا واوعى تسقط ’ الإمام ابن القيم – بيقول ” ليس للعبد شيء أنفع من صدقه ربه في جميع أموره….،ومن صدق الله في جميع أموره صنع الله له فوق ما يصنع لغيره”

فيديو غفرانك ربي

أضف تعليقك هنا