فن التربيه

فن التربيه

??
مفيش حاجة بتشغل الأب والأم غير ولادهم اللي هما اغلي حاجة في حياتهم
وتربيه الاولاد مسئوليه الأبوين
_تنشئه الطفل نشأه سليمه هي مسئوليه الاسرة
الاسرة هي أول مؤسسه الطفل بيتعامل معاها
أول قواعد أول قوانين أو انضباط بيشوفهم في حياته يبقوا في اسرته اللي هي اول عالم الطفل بيتعامل معاه

___أساليب التربيه

كل أب وأم بيربوا ولادهم
بس مش كل أب وأم بيقدروا يربوا تربيه سليمه
مش كل اب وأم بيقدورا يخرجوا للمجتمع جيل واعي، جيل شخصيته سويه. نفسيا وفكريا وروحيا وجسمانيا
_من أهم اساليب التربيه هي التربيه بالملاحظة:ملاحظة الطفل في كل حاجة بيعملها ،راقب تصرفاته علشان تعرف ميوله وتوجهاته
ودا طبعا من غير ما تضيق عليه أو تحسسه انك بتراقبه علشان ميفقدش ثقته في نفسه وفيك.
وعلشان تضمن انك بتربي ابنك تربيه سليمه لازم تضمن له الأمن والاستقرار وتحقق له السكينه النفسيه والاجتماعية لأن الطفل اللي بيعيش محروم من عواطف الأهل في طفولته مبيعرفش يحب الناس اللي حواليه لما يكبر ولا حتى يتقبل محبتهم ليه

قواعد التربيه السليمه

?
علاقتك الإيجابية بابنك هتخليه يثق فيك وعلشان تبقى علاقتك بيه ايجابيه لازم يبقى في مشاعر متبادله ما بينكم ،كلمه حلوة أو حتى سلوك حلو
كتير من الاباء والامهات مبيعرفوش يعبروا لاولادهم عن حبهم ليهم ودا اللي بيخلي مفيش ثقه بين الآباء والأبناء
_اتعاملوا مع ولادكم على أنهم كيان مستقل يعتمد عليه علشان يبقى عندهم ثقه في نفسهم .
متنتقدوش تصرفاتهم باستمرار وحاولوا توجهوهم برحمة ورفق

_عودوهم من صغرهم أن يبقى عندهم قدوة عايزين يبقوا زيها ،عندهم هدف وحلم عايشين علشان يحققوه
خليكم انتوا قدوة ليهم في الاخوة والرحمة والعفو والجرأه .اغرسوا فيهم روح مراقبه ربنا ليهم .علموهم حقوق الآخرين وازاي يراعوها
وقبل كل دا ياريت ياريت ياريت تعلموهم الانتماء وتغرسوا فيهم حب الوطن ،الارض ،الجيش.مش اشخاص وافراد
عرفوهم أن حب الوطن مش تطبيل اللي بيحب وطنه وبيدافع عن جيشه مش لجنه ولا بيقبض فلوس مقابل دا

_بتهتموا تأكلوا ولادكم أحسن أكل وتلبسوهم أحسن لبس
لكن كام اب وكام أم فكرت تثقف ولادها وتوعيهم ،تقعد تتكلم معاهم علشان تكسب ثقتهم وتعرف هما بيفكروا في ايه تعرف ميولهم وتناقشهم
انتوا اللي سبتوا ولادكم من غير ما توعوهم وتفهموهم
سيبتوهم للجماعات المتطرفه اللي لقت عقول فاضيه تربه خصبه تقدر تزرع وتنشر وتروجفيها اللي هي عيزاه
_بقى عندنا جيل مشوه فكريا ،جيل بيقدس لاعب كرة ،ومش فارق معاه الجندي اللي واقف ع الحدود في البرد والحر بيحمي الارض والعرض

_الثقه

ازاي الطفل يبقى عنده ثقه في نفسه؟؟؟
ثقه الطفل في نفسه بتبدأ من تسميه الطفل أول ما بيتولد ،بتسميه اسم حلو لأن دا هيفضل ملازم ليه طول عمره وبيبدأ يكبر شويه ويتكلم فلازم انك تسمع كلامه للآخر وتسمع باهتمام ومن غير ما تقاطعه
بعدها بيبدأ يتعرف ع العالم اللي حواليه فمهما غلط او فشل لازم يبقى الأب والأم مصدر دعم وقوه وتشجيع ليه بعدها بيبدأ يدخل مراحل التعليم فلازم تحتفل بنجاحه حتى لو نجاحه صغير او بسيط بس دا بيفرق معاه كتير وبيأثر على نفسيته وبيدفعه انه يبقى أحسن بيبدأ يتعرف على اللي حواليه فيبقي عنده صحاب
هيبقى فيهم الاحسن منه اللي بيطلع الأول مثلا مش من الصح انك تقارن ابنك بحد غيرة ،دا هيخليه ضعيف الشخصيه ومش هيعرف يحس بقيمه نفسه ابدا بعد كدا …..هيكبر ويبدأ يدخل في مرحله المراهقه فتبدأ تتقرب منه وتتكلم معاه اكتر وتصاحبه وتبقى جزء من حياته تعرف صحابه تعرف ميوله بيحب ايه سمعه كلام حلو حسسه انك بتحبه وان هو مهم عندك فهمه الدنيا ماشيه حواليه ازاي لما توعيه وتفهمه وهو صغير مفيش حد هيقدر يضحك عليه ولا يستغفله .. …..و دا هيفرق مع ابنك جدا لما يحس انه قريب منك وانه مهم عندك هيحس بالأمان وهيحكيلك على كل حاجة كبيرة وصغيره

_أخطاء في التربيه

بتبقي فاكر انك بتربي ابنك تربيه سليمه وأحسن تربيه كمان بس ممكن تعمل حاجات انت شايفها بسيطه وتبوظلك كل اللي انت بتعمله زي خوفك وقلقك الزائد من كل واي حاجة حواليه وبكدا الطفل هيعتمد عليك في كل صغيرة وكبيرة وهتبقي انت اللي بتحركه،بتوجهه،بتقوله يعمل ايه ،هتبقي انت اللي بتعيشله حياته وعكس دا الاهمال الزائد اللي هيخلي الطفل يحس انه نكرة،ولا حاجة ولا فارق مع أي حد
(لا اللين الدائم ولا القسوة المفرطة هتطلع جيل سوى)
*التسلط :انك تبقى بتختار له كل واي حاجة في حياته بحجه انه صغير ومش فاهم ودا هيضعف شخصيته ويخليه ملوش أي قيمه في الحياه
*التميز : انك تميز بين ولادك تميز بين البنت والولد في التربيه دا يخرج وهي لا
تميز بين الكبير والصغير
الكبير عليه مسئوليه والصغير ياخد الدلع كله
*العقاب المستمر وأنك تقلقل من اهميته بتوجيه الكلام الجارح ليه قدام الأصحاب والأهل
*التناقض : انك تطلب منه ميكذبش وف نفس الوقت انت بتكذب
دي كلها أخطاء في التربيه بتؤدي لوجود جيل مشوهه ،غير سوى
#في النهايه عندي رجاء أخير من كل أب وأم
ياريت تقولوا لاولادكم كلام حلو كتير
شجعوهم ابقوا مصدر قوة ودعم ليهم .
ساندوهم ،حسسوهم انكم في ضهرهم دائما وابدا وانكم مش هتتخلوا عنهم ،طمنوهم ،حسسوهم بالأمان
علشان لو ملقوش دا عندكم هيروحوا يدورا عليه برا

فيديو فن التربيه

 

أضف تعليقك هنا