الغربه اللى بجد – مقال #باللهجه_المصرية

كل واحد فينا إحنا البشر إتولد ف الدنيا من أول ثانيه ليه بيدافع وبيطرد ف الحزن والهم ونفسه يجمع كل اللحظات الحلوه والسعاده والفرحه تفضل معاه ،وده بيبدأ لما نكبر ونبدأ نفكر ونحلم ونتمنى نبقى حاجه ف الدنيا اللى نفسه يبقى دكتور واللى نفسه يبقى مهندس واللى نفسه يبقى طيار واللى نفسه يبقى مشهور وغيره كتير ….

أهداف اختيارات الانسان

ولما نكبر شويه نبدأ نختار مستقبلنا على مزاجنا أو غصب عننا كله بيحط هدفين ف اخياراته

الأول: الفلوس لاننا بنشوف ف الدنيا اللى معاه فلوس بيحكم ويبقى صاحب الكلمه المسموعه والمطاعه محدش يقوله إنت بتعمل إيه ولا حتى يناقشه ف كلامه

التاني: النفوذ والسلطه يأمر ويحكم ويعمل كل اللى ف نفسه وقت ما يحب .

عواقب الخيار الأول….

وعشان يبقى معاه الفلوس ويحقق كل اللى نفسه فيه بيبدأ يمشى طريق طويل مليان مغامرات وبيتحمل كل إهانه وإساءة وفيه اللى ممكن يضحى بكرامته بس المهم يوصل لشويه فلوس واللى بيتغرب عن بيته وأهله ويسافر مهما يسافر وياخد معاه شويه ماضى وذكريات فى شنطته ويبدأ ينطلق فاكر إنه كدا بيحقق لنفسه السعاده اللى ممكن تقابله بالصدفه وممكن تسيه فى أى وقت ويفضل يتغرب ويحاول يلاقى لنفسه وطن هوا أصلا مش وطنه عايش فيه زى اليتيم ويرجع لأهله معاه شويه فلوس او شويه هدايا بيجيبها يفرح بيها ولاده ويعيش معاهم زى الغريب ويرجع تانى يتغرب وبالصدفه يقابله الموت وهوا يدوب كان لسه بيفكر هيتعرف إزاى على الدنيا اللى نفسه يرجع يبنيها ف أرضه اللى عاش عنهاغريب والحياه مرت عليه بسرعه وعمره عدى.
بس الأصعب والأقسى من غربه الوطن غربه النفس كونك تعيش حياتك كلها مش عارف نفسك او مش لاقيها او مش عارف تتلم عليها او حتى تصاحبها ، لما تعيش حياتك كلها تتهرب منها او مش فاضى تتكلم معاها كل لما تضيق الدنيا بيك وهمومك تكتر عليك دى تبقى فعلا وحده بجد وغربه بجد .

غربة النفس

والغربه كتير مننا بيقدر بيتغلب عليها وفيه اللى مبيقدرش يتكيف معاها ،يكون وسط أهله ووسط ناسه ومش عارف نفسه .
اللى بيتغرب بعيد عن ناسه لازم يلاقى نفسه علشان لو عاش غريب عن وطنه وكمان غريب عن نفسه يبقى يعرف انه أصلا ما اتولدش لو حتى عمل ملايين الملايين من الفلوس .
علشان تعيش فى سلام مع نفسك لازم تتعرف عليها وتعرف إزاى تسعدها وتعرف إزاى تدلعها وامتى تحاسبها علشان تعرف تكمل معاك مشوار حياتك الطويل ، وكمان قيل :
النفس تميل لمن يدللها
والروح تعشق من يمنيها
والناس تقرأ من نواظرها
والدور تعرف من سكن فيها ..
إزاى تلاقى نفسك وفين ؟

حاجات كتير ممكن تلاقى فيها نفسك وتقدر توصل بيها للرضا الداخلى:

1- أول حاجه تحط لنفسك خطه واهداف لحياتك الكبيره اللى ممكن تتوه فيها وتوه معاها .
2-وتانى حاجه لازم تعرف إزاى ما تزعلش حد منك وﻻ تزعل من حد علشان مش محتاج تخاصم، انت أكبر من أى خصام أو زعل ((الدنيا لاتساوى جناح بعوضه)) بالطريقه دى هتلاقى كل الناس بتحبك
3-تالت حاجه لما تحس إن الدنيا مالت عليك إتكلم مع حد وفضفض للى يقدر ينصحك ويحب يتكلم معاك
4-ورابع حاجه وده الاهم : علاقتك بربنا هتصلح كل اللى فات من غير ماتحس وعمرك ما هتوه عن نفسك ولا تشقى وﻻ تحزن أبدا ، ﻻن ليك رب نفسه يسمع صوتك كل صلاه ونفسه تفضفض معاه ومش هيمل منك …

فيديو مقال الغربه اللى بجد – مقال #باللهجه_المصرية

أضف تعليقك هنا