فن الخسارة – #لهجة مصرية

الخسارة لا تعطي تنبيها

الحقيقة أننا يوميًا في حياتنا نتعرض للخسارة بشكل ما، ويمكن أوقات كتير ما بنبقاش مدركين إننا بنخسر أصلًا، بس مين قال إن الخسارة لازم تزمر قبل ما تخش عليك! هي مش جاية تركن جنبك. أنت يدوب واحد من ملايين اللي هتعدي عليهم النهاردة في سكتها عشان تختبرهم في حاجات قريبة ليهم وعزيزة عليهم عزيزة عليهم جدًا.

خسرنا كثيرا منذ طفولتنا

من واحنا أطفال بدأنا لعبة الاختبارات دي والخسارة، هتاخد حاجة يبقى هتسيب قصادها حاجة قانون الدنيا ولازم تخضعله زي ما غيرك رضيوا بيه وعاشوا وأساسًا ماعندكش اختيارات تاني وأهو تخسر حاجة وتكسب غيرها أحسن ما تخسر بس.

خسرت لعبة وكسبت لعبة تاني غيرها لأن الأولانية اتكسرت، المرة اللي بعدها خسرت لعبة وكسبت غيرها لأنك كبرت على اللعبة الأولانية، المرة اللي بعدها خسرت لعبة وكسبت غيرها لأنك فقدت اهتمامك وشغفك باللعبة الأولانية. كبرت شوية. خسرت لعبك كلها لأن الموضوع مبقاش في دماغك أصلًا.

مهما كبرت وبدأت الحاجات اللي بتخسرها تبقى أكبر من مجرد لعبة ووصلت لأنك بقيت تخسر حلم، صديق، أهل، حبيب، حتى نفسك ممكن تخسرها في يوم من الأيام، ورغم اختلاف التفاصيل في حكاية كل واحد فينا إلا إننا كلنا بنخسر تقريبًا لنفس الأسباب. اللعبة اللي أتكسرت زمان بتتحول لحلم بيتكسر فبتخسره، صديق بيكسر عشمك فيه، حبيب بيكسرك أنت شخصيًا.

اللعبة اللي مابقتش مهتم بيها بتتحول لحلم زهدته بعد محاولات كتير، صديق سابك في نص الطريق، أو حبيب اكتشف إنه فجأة مَل وجودكوا سوا. اللعبة اللي أنت كبرت عليها زمان وخسرتها بتتحول لحلم مبقاش يناسبك دلوقتي، وصديق رجع بعد ما أنت قدرت تعديه، وحبيب عقلك كشفلك قد ايه ماتنفعوش لبعض.

لا مفر من الخسارة 

مهما حاولت تهرب من الخسارة هي هتوصلك، عارفة طريقك كويس وعارفة هتختبرك في إيه، بس مش معنى كدا إنك تسيبلها كل حاجة وتقعد تتفرج، كلنا جايين في الدنيا دي رحلة، فترة وهنمشي وشايلين على كتافنا كام حلم وكام شخص يهونوا السكة، بس كل واحد وليه طاقة مهما عافرت فأنت مش هتقدر تشيل أكتر من اللي تتحمله.

لازم بعد كل محطة تقف تحسب حسبتك تاني وتراجع نفسك، مين بيصعب السكة مابيهونهاش، مين كان مجرد فترة في طريقك ومش هينفع يكمل، مين صاحب العمر اللي لازم تحافظ عليه، ومين اللي مش هينفع ولا هتعرف تكمل من غيره، ركز بورقك من جديد وماتخافش تخسر، لأن خوفك مش هيمنع خسارة ولكنه هيخليك مش مركز وأنت بتخسر.

انت كدا كدا هتخسر حاجة بس لازم تبقى عارف كويس هتخسر إيه وازاي وأمتى، وماتقلقش عمرك ما هتخسر إلا وأنت واخد تعويض عن خسارتك.

فيديو مقال فن الخسارة

أضف تعليقك هنا