بقلم: حماد ماادة

السابعة صباحاً

والله اعلم 7 الصبح دة معاد احنا فهمناه غلط اعتقد. معاد دة مخلوق واتحط على الساعة لجرى, تمشية, كوباية قهوة وسيجارة, اى حاجة شخصية غير انة يبقى معاد شغل او بداية يوم عمل او انتظار اتوبيس جاى يشيل كريمة الموظفين من على وش المحطة, فكرة نطت من دماغى اول ما نطيت على السلمة الاولى للاتوبيس يد ماسكة ماصورة الباب يد ماسكة فلوس التذكرة بعت فلوس التذكرة للكمسرى منتظرا دورى فى داورة حياه الاتوبيس, الى قدام ينزل الى ورا يطلع من على الباب اللى قرب ينزل يقوم, اللى واقف يعد.

بمرور المحطات استغربت انى لسة واقف على الباب اللى ورا الناس بتنزل قدام بس احنا مابنطلعش؟ الناس بتنزل واحنا واقفين, للدرجة اللى خلت واحد بيركب, نط مسك فى وسطى وحاطط رجلة على رجلى المدلدلة برا وقام مطلع 5جنية و بيقولى ابعت1! ابعت اية يا معلم دانت راكبنى انا. بس كان لازم اطلع عشان انزل من قدام, وطلعت.

في الحافلة

ما طبيعى الناس ماتتحركش فى الاتوبيس! طلعت الاتوبيس او للدقة حافلة ريال مدريد او شارع عبعزيز. كامل الركاب ياللى واقفين وششهم فى الارض عنيهم على الموبيلات سمعات فى ودانهم ومشغلين الجسم على الهزاز لا اللى واقف شايف الكرسى الفاضى, واللى قاعد مستنى جوجل ماب تقوله انزل هنا, 60راكب  ماسكين موبيلات و٣بس اللى ايدهم فاضية نشال والسواق والكمسرى مركز مع النشال.

بالنسبالى كشخص غير حشرى رحلة الاتوبيس فيها حاجات كتير ممكن تركز فيها عن الناس, الحتة اللى بتنزل فيها مثلا عشان ماتروحش عليك, الحتة اللى تعدى جنبك بردو عشان ماتروحش عليك, معالم فى الطريق –اوبا- اقصد احداث فى الطريق, بس كان نفسى اعرف ايه اللى جوة مخلى الناس كلها بقى تركزها فى نفس الحاجة, ممكن مايكونش الكل بيتابع حاجة واحدة على الموبيل بس بقى الكل تركيزة فى مستطيل واحد.

يمكن عشان كدة بقيت اكلم ناس كتير جدا الاقى رددهم واحد؟ بطلب مساعدة من حد فى الشغل الاقى 8 افكار هم فكرة1؟ حتى النكتة بقيت اسمعها 5 مرات من اشخاص مختلفين!! التناسل وقف وبقينا بنكبير؟

تكيف كبار السن مع التقنيات الحديثة

اه حاجة تعجبك راجل 60 سنة مثلا عارف يبعت ميل وبيكلم ابنة فيديو كول على الفيس بوك, اللى قبل كان اقصى تفاعلة مع الحياة هو الجرنال فى البلاكونة بس ئه, يعنى, تمام. انا شخصيا مش متاثر بحاجة اوى بس حسيت بحالة تغيب ولا وعى موجودة بدليل لو اللى بتشات معاه دة طلع الاتوبيس مش هات.حس بيه أصلاً؟ يا بيه لو واحد جنب الشباك سقط و اغمى علية, هايسبوه نايم.

انا ومن ناس كتير –اكتشفتهم مؤخرا- اوى مابقناش مثلا فاهمين الموبيلات من بعد الـ 3310 ايه التطور الاجتماعى اللى عملتة فى الحياه؟ ايه اللى ادتهولنا ذيادة بقى التواصل المحسوس بنا أحسن. يمكن بره عندهم نفس المشكلة و عشت فى مجتمعات عندها نفس الحكاية بردو بس -سيد- معوض دة (هاهاها اسف)بس اللى معوض دة العائد المادى وراس المال والتطور التقنى اللى بيجى فى الموضوع.حاجة زاى التاتش اللى عرفناه احنا فى الموبيلات, ناس عرفوة فى المتاحف لعرض المخطوطات النادرة.

بوص, خلينا نكلم بصراحة العالم مش بيمشى بضهره, ولا البشرية هاتسيب حاجة وصلتلها بس خلينا نفكر لو كل واحد حاول يفهم اللى فى ايدة, ياسيدى فتحة وصلحة, عمل برنامج علية واستخدمة حتى لو بيحاول يفهم بيشتغل ازاى يمكن بأى فكرة لو طلعنا بره المستطيل دة هانكتشف اد اية هو صغير اوى على اللى ممكن نعيش فية. (داس كنترول/ تى وقفل اللاب).

بقلم: حماد ماادة