الطريق إلى النجاح دائماً تحت الإنشاء

كان أقصى فشل بالنسبالي هى درجات الاختبارات ,قد ايه أرقام سخيفة ممكن تبعد الواحد عن سلم النجاح، حالة الندم إلى كانت بتبقى مدفونه جوايا كانت سبب أن الاغلب مكنوش مؤمنين بيا.

ذاكرى ذاكر ذاكرى؛ كلمة مكروهة بتحدد مصيرك، يا تبقى عالم، يا فاسد، مع إنها مش مقياس، ممكن أذاكر ومجبش والعكس صحيح..

كلمة بعدتني عن كتير من مواهبي، أنا كنت زمان بحب الرسم عشان ذاكرى بطلتها، وكنت بحب القراية عشان ذاكرى بطلتها فترة، اكتشفت من العزلة إني بحب الكتابة، بقيت أدون كل حاجه بتحصل في يومي بشكل سري محدش يعرف حاجة عنه، كأني بحكي لنفسي بس طلع إني كنت بنمي موهبه!

ليس هناك تحدي أكبر من تطور ذاتك

حبي للكتابة خلاني لوهلة أفكر أدخل كلية تمنيها، مع إني جايبه مجموع كبير بس للأسف المجتمع عمرُه ما هيصدق مجموع كبير وكلية صغيرة، علاقه عكسيه محدش يصدقها، وزي أي حد دخلت الكلية الي يخليني مرموقة.

أنا مبحبش هندسه! كنت كدابة لما قولت خلاها حب، حتى كلمة مهندسة بحسها مش مجهودي الي كنت منتظراه..

“الكليه دي الي هتشغلك في أحسن أماكن والناس تحترمك”.

اتخرجت واستنيت “احسن الاماكن” عشان اشتغل فيها ولما جت…

كنتِ مستنية اسأله عن -مثلاً- قانون “فراداي”، ولا وريني قاعدة “فليمنج”، ولا ازاي بنختبر الكبلات، بس اكتشفت غير كدا…

“شايفه نفسك ايه بعد خمس سنين؟”

_سؤال مجاش ف بالي، اللسان عجز عن الإجابة، شايفة نفسي الي مخترتهاش بحب.

“عرفي نفسك”

_واحدة اتحكم عليها تعيش جو روتينى عشان الناس تبصلي باحترام.

النضال من أجل التميز هو ما يحفزك

من تجارب ومقابلات عديدة اكتشفت أن 99,0% زي ديتول كدا محدش فيهم حابب شغلة حتى لو مبهور بيه ف الاول، بعد كدا جو الروتين هيزهقه

بس أنا قررت مكونش “فاشله” مبقاش إتوجدت ف الدنيا لهدف اشتغل، أو حتى أقعد ف البيت أخلف وأربي عيال وأموت ولما حد يجي يفتكرني، هي عملت ايه! ندى مين!

حتى لو بإنجاز صغير عند فئة قليلة، بس اسمي عملت.

قررت بدل ما اكتب عن يومياتي لنفسي، اكتبها للكل، واكتب ازاي طلعت من قزقعه “انتِ فاشلة” ل إن شاء الله “دي عملت حاجة”.

أنا أعترف إني نجحت، إني آخد خطوة، عرفت إننا ف عصر اسمه “عصر التحدي”.

تذكر دوماً ما أنت بارع فيه وتمسك به

كتاب “how to fail at almost every thing and still big win”، عرفت من خلاله أن النجاح مش ضربة حظ، النجاح إرادة بخطوات لازم نتبعها.

مافيش إنسان على وجه الأرض فاشل، في إنسان بيكسل يفكر ، كأن النجاح دة حاجه فطريه مولودين بيها..

يجب اتباع نظام وليس هدف

الهدف حلم ممكن أحققه أو لا، لكن النظام مجبور عليا زي الرجيم مش بخس لو حطيت ف دماغي بس كدا، ولكن هخس لو اتبعت نظام غذائي.

مهارة واحدة لا تكفي

مينفعش الواحد يقتصر حياته على مهارة بس، مينفعش كتابه، بس رسم، بس غنا، بس تبقى متعدد المهارات أحسن ما تبقى مهارة واحدة بس “اعرف عن كل حاجه”.

صل بين المهارات

لما يكون عندك كذا مهاره حاول كدا “تخدلهم في بعض” بتحب تكتب وبتعرف ف الأوفيس استغلي ده في الكتابة.

بتحب تغني وبتفهم ف هندسة الصوت استغلّ ده.

كن صافيَ الذهن لتنتج أروع ما عندك

لما يكون الذهن مرتاح، والبال خالي من أي هموم، الواحد بيعرف ينتج اكتر، بيعرف يفكر ويطلع مواهب، استغل وقت الفراغ ف “انت تعرف تعمل ايه”، لأن الضغط والعصبيه ممكن يصنعوا من الواحد ريبورت روتيني، معقد مع نظام معين مش بيتغير، ميلقيش ولا وقت ولا مزاج للانتاج..

إننا نصنع مصائرنا، إننا نصبح ما نفعله.

متستسلمش للفشل، متستسلمش ل “أنا مش موهوب، ولا مش بعرف بعمل حاجه, أنا نكرة , أنا عايش ليه؟!”

الحياه فرص، لو ملحقتش فرصة.. الحق التانية.

فيديو مقال من الفشل… تستطيع