بقلم: شموخ اكحيله

🌺 شموخ اكحيلـه 🌺

الكــاتبه البتول الــزنتانــي 👑

_______الحلقــه السابعه والعشـرون 27

فاجعة موت الأم

كانت الصدمه والفاجعه كبيره لدرجه هناء كانت

اتكلم في امها وتتوقع انها اتنوض ..

خواتها ايعيطو وهي تتكلم مع امها ..

هناء: ماتموتيش لمن تخلينا ..

كيف تموتي لاتوصي لاتقولي شن في خاطرك

كيف اني قبل ربع ساعه جنبك مافيك شي تموتي

كييييف! !!!

فاتت الساعات وكـأنها ثواني .. وهما ماصدقوش

ولا استوعبو رغم ان امهم ميته قدامهم

وبدت تزحم اعليهم في المستشفي خالاتهم

واخوالهم وعماتهم ..

روحو بيهم للحوش .. بعد جهد كبيرررر من الاقناع

وهما مايبوش ايخلو امهم بروحها

ووصلو الحوش .. كان صوت لعياط معبي الشارع

كله وانتشر الخبر ..

هناء قعمزت في لمكان اللي ماتت فيه امها وابدت

اتعيط لين صوتها راح .. واللي تبي اتجي تحضنها

وتواسيها ادفها بقوه وتعيط ..

💔💔 وفعلا ان المصائب لاتأتـي فرادا ..

لما يبي ايجيك الهم حيجيك مع بعضه ووراء بعضه

لدرجه ايجيك شعور ان الهم اللي في الدنيا

ماتوزعش عالناس وكله اخديته انت ..

هناء ماتبيش حد يقولها امك ماتت ولا تبي

تسمع شي عن الموت

وسمعــت شموخ …. كان الخبر زي الصاعقه اللي نزلت

اعليها الصبح كانت هناء عندها وماقالتش ان امها

مريضه والا تعبانه .. كيف ماتت! !!

طلعت شموخ وامها ماشيه لهناء..

يلاقيهم اسماعيل ..

اسماعيل: وين ماشيات

ام شموخ: ام هناء صاحبة شموخ توفت معرفناش

من شن

اسماعيل: اي فيه صوت عياط

شموخ: هيا

ومشت هي وامها .. وخش اسماعيل للمربوعه

كيف يوصل لهناء كيف يشاركها همها وايخفف اعليها

كيف بتكون توا دايره والصوت واضح لعياط اكتر

شي صوتها هي طالع من حوشهم ..

يتفكر فيها لما تقوله اني اكتر شي انحبه في الدنيا

انت وامي .. نعطيكم روحي ولايصيرلكم شئ

وايغص قلبه كل ما يتفكر شن قاللها الصبح

واكسر خاطرها ويتخيل فيها وهي طالعه من الباب

تقوله اسماعيل ماتبي تقولي شي !!

كسر قلب هناء

💔💔 مايهونــــــش …. الشخص اللي اتحبه

كان ايديرلگ شن لا حيهون ولا حتكسره وحتقدر

تتخلي عنه .. ولو دار قرار انفصالگ عنگ الف مره

في راسگ قلبك مش حيخليگ ومش حتقدر

تاخده القرار هذا .. وكأن القلب ابدي مربوط بلقلب

والروح سكنت في الروح ولا مفــر منه ❤

وصلت شموخ وامها لحوش هناء ..

خشت شموخ تجري .. ماكلمت حد

وخلت امها اوراها ..

شبحت هناء اتعيط ومقعمزه في مكان امها

جت بتقرب قتلها عمتها خليها اللي تقرب

منها ادفها …

قربت شموخ من هناء وعيونها اتعبو دموع

شموخ: هناء

قامت هناء راسها وحضنت شموخ بقووه وابدت

اتعيط وتبكي هي وياها .. مافيش وحده منهم اتكلمت

كانو يبكو بس …

لحظه تعاندك فيها الدنيا وتاخد منك كل شي

في مره وحده يكتر اعليك الهم لدرجه معاش

تعرف انت علي شن تبكي …

هناء: امي ماتت ياشموخ روحت منك مافيها شي

كلمتها شوي وطاحت ماتت

شموخ: اهو بوي مشي قبلها شن درت اني

عيطت وابكيت شن درت رجعتها

هناء رجعت اتعيط بصوت عالي ينسمع في الشارع

كله ..

امي شفتها وكلمتها وماردتش

نكلم فيها ماردتش

رافعينها المستشفي احسبت الضغط راكبلها

طلعت ميته ..

وقعدت هناء مع شموخ اتعيط وتحكي وتعاود

في نفس الكلام ..

شموخ: اصبري جربناها ودقناها كلنا

مش انتي اللي صبرتيني

هناء: مانحسابهاش هكي حاره ياشموخ

شموخ: دورتها واعره الدنيا اعلينا

تحصد فيهم روح ورا روح ويمشو وتقعد ارواحنا

متعلقه فيهم لااحني حيين لا ميتين

اطلبي الصبر من ربي بس

هناء: صبر علي امي شن مازال بعد امي

راهي الام مش حد تاني

شموخ: واني بوي مشي شن درت باهي

بدت الزحمه وكترت الناس وهناء هدت شي

تبكي بس ومعاش اتعيط بصوت عالي

شموخ: حرام هكي وجهك رسول الله عليه الصلاة

والسلام ناهي عليه وجهك امخبش كله دم

علاش اديري هكي

هناء: تو كان ماجربتيش نقولو جربتي

مات بوك ومازاال تلومي

شموخ: هي حاره مش اسمها الموت لكن مع الايام

تو تصبري

هناء: نصبر علي حوش مافيهش امي

قرب أدان العصر وبيصلو علي ام هناء

جابوها اولادها قبل لايرفعوها للمقبره لحوشها

وفي التابوت دوروها في حوشها كله ..

نبه اعليهم ولدها ان مايسمعش صوت عياط

لين ايطلع امه ..

بعد المنظر هذا مافيش الم .. انهم يشوفو في امهم

اخر مره وبتطلع للمقبره ..

وطلعوها ركبوها في السياره وهناء وخواتها

يمشو ورا خوتهم …

وداع هناء لأمها

هناء رجعت اتعيط في الشارع .. قعمزت ع التراب

واتعيط .. اينوضو فيها ماتسمع في حد

هناء: امي رفعوها معاش بنشوفها

اخر مره شفت فيها امي اليوم

جتها شموخ شدتها من يدها ونوضتها

شموخ: نوضي انتي ماتندريش علي روحك شن

اديري انتي في الشارع

دخلتها وقعمزت جنبها .. وهناء كأنها في دنيا

اخري تبكي وتحكي شن قالت امها وشن دارت

واتمر الساعات والصدمه مازالت مسيطره

علي وجوه الناس … وهناء وخواتها

موتها كانت فاجعه بلا مقدمات ..

ام شموخ: بنروح

شموخ: اي روحي المغرب اقريب واني قولي

لاسماعيل ايجيني موخر

ام شموخ: ان شاء الله

روحت ام شموخ القت اسماعيل في الجنان

امقعمز

اسماعيل: كيف بنجيك

ام شموخ: والله كان مش بوك ميت راهو قعدت

معاهم للصبح بناويتها بيهبلو هده هناء صاحبة

شموخ قعمزت في الشارع ع التراب واتعيط

اسماعيل ; ربي يصبرهم حتي لولاد في المقبره

بكل متأترين

ام شموخ: قتلك شموخ بعدين تعالي

اسماعيل: تو نمشيلها نستني في رضوان

ايجيني بنمشي انظف الجرح

ام شموخ: انحس في روحي مرضت صورت

هناء بين عيوني ومش مصدقه بكل

اسماعيل: هي مريضه ولا كيف مات

ام شموخ: سكته قلبيه جتنا هناء الصبح

اسماعيل: ربي يرحمها ويصبرهم عام أحرف عالنا

كلها

صوت سياره هدا رضوان تو انجيك مانعطلش

ام شموخ: ربي يحفظك راك تمشي للحرب

اسماعيل: لا مافيش جبهات قاعد

ام شموخ: باهي

طلع اسماعيل لرضوان ..

رضوان: خيرك وجهك مقلوب الموت ع الكل

اسماعيل: الله يرحمهم كلهم اولادها في المقبره

ايمرضو

رضوان: اولادها ولا بنتها

سكت اسماعيل ..

رضوان: خيرك سكتت

اسماعيل: هيا خلي نمشو للمستشفي ونبي

الجامع

رضوان : باهي

رفعه للمستشفي نظفوله الجرح

ووقفه ع الجامع ..

رضوان: انزل

اسماعيل: تو انجيك استناني

ماقالاش نبي ننزل معاك .. ولا تبعه شن يبي

ايدير ولا سببله احراج ..

ماعطلش .. شوي وجي جايب شيشة اميه

رضوان : وين نمشو

اسماعيل: لشموخ نبيها

ولع السياره ومشي للشارع ووقف قدام حوش

اهل هناء

نزل اسماعيل ضبح علي ولد صغير

قاله خش قول للشموخ يبيك خوك البرا

خش الولد الصغير القي شموخ

جنب هناء

الولد: شموخ يبيك اسماعيل البرا

شموخ: اعلاش جاي توا شن بنروح توا اني

يارب استر ابصر شن صاير

طلعتله قدام الباب

شموخ: شن تبي مازال

اسماعيل: هاك هده رقيه جبتها من الشيخ

اعطيها لهناء واغسلي وجهها بيها

شموخ: باهي لكن مش مروحه راه مازال

اسماعيل: تو نرجعلك بعدين

خشت شموخ للمطبخ جابت طاسه

وقعمزت جنب هناء .. كانو فيه نساويين ايعزو

فيها .. استنت لين امشو

صبت لميه .. واعطتها لهناء

هناء: والله توا حتي لعسل مر

شموخ: هده رقيه

هناء: شن رقيه بندير بيها بالله فكيني

شموخ ; جابها اسماعيل توا قالي اعطيها

تشرب منها وتغسل وجهها اشربي اني قتلك

تو نعطيهالها

خدتها هناء وشربت منها .. ورجعت تبكي بقووه

شموخ: اصبري والله كلنا جربنا وصعبه بس

هذا قضاء الله شن بديري

هناء: شموخ شن هو بعد امي يستاهل انعيش

علي خاطره شن فيها ما ايفرح الدنيا

شموخ: واسماعيل اللي توا ربي عالم بحاله

جايبلك الرقيه يبيك تهدي وتكوني قويه

واني والله ما انخليك بكل .. وخواتك وخوتك

وبوگ كلهم مش حيخلوك

هناء: ماصليتش ولا ركعه اليوم

شموخ: نوضي اتوضي وصلي واستغفري

هناء: مش قادره اندير شي

شموخ: نوضي واطلبي من ربي الصبر بس

ناضت هناء خشت اتوضت ..

وخدت الردي متع امها … لبساته وابدت اتصلي

بيه …

حزن وبكاء هناء وشموخ

وشموخ تشبحلها وتبكي …

كانت تبكي بصوت وهي اتصلي وتنزل اتسلم

واتقعمز تبكي … تحاول اتكمل صلاتها ماقدرتش

حطت يديها علي وجهها وبدت تبكي

يااارب صبرني … علاش امي … علاش

خليتني من غيرها … باهي ياربي علاش مامرضتش

اقل شي نتوقع انها بتموت …

وناضت رجعت اتصلي .. كملت صلاتها …

وقعمزت تستغفر .. وشموخ تشبحلها وتبكي

لأن الشعور مجرباته .. واتفكرت يوم وفاة بوها

والصدمه اللي عاشتها …

شموخ: هناء نوضي تعالي نبيك

جتها وقعمزت جنبها

شموخ: اني لما درت زيگ جاني بوي في الحلم

ومايبيش حتي يشبحلي عيطت اعليه

واندبت وتوا ندمانه نقول يارب يسامحني

ماتغلطيش غلطتي

هناء: ياارب يصبرني بس

شموخ: تو تصبري

هناء: معاش بتنوضني الصبح

شموخ: ادعيلها بالرحمه امك اول ليله

ليها في القبر ادعيلها انتي دعائك يوصلها

هناء: يااارب تبتها واغفرلها ربي يرحمك يا امي

شموخ: يارب

وفات الوقت وهناء اخدت مصحف وابدت تقرا فيه

شموخ: جاني اسماعيل من الفجر تلقيني عندك

هناء: ان شاء الله

طلعت شموخ وركبت مع اسماعيل

وبدت تبكي ..

اسماعيل: خيرگ

شموخ: ماعمري شفت هناء هكي منهاره

اسماعيل: امها ربي يصبرها

شموخ: يارب

اسماعيل: توا تبكي مازالت

شموخ: اي تبكي لكن تقرا في المصحف ..

المصحف اللي انت جبتهولها في عيد ميلادها ..

سكت اسماعيل .. لين وصلو الحوش وهو ساكت

ولما وصلو نزلت شموخ ..

شموخ: انزل

اسماعيل: عندي مشوار

شموخ: ماتعطلش

اسماعيل: خشي شوي وانجي

خشت شموخ .. ورجع اسماعيل وقف سيارته

قدام حوش اهل هناء

مايفكرش .. قلبه هو اللي رفعه وخلاه يمشي

المهم ايحس ان اقريب منها .. ويطمن

جاه خو هناء ..

خو هناء: تبي اختك

اسماعيل: لالا روحت بيها غير بعتت معاي

رقيه للعويله الداخل عطيتها توا دخلوها

خو هناء : الله يبارك فيك تعبناك

اسماعيل: ان شاء الله ربي ينزل الصبر

ويرحمها

خو هناء: اي والله

اسماعيل: هيا تصبح علي خير

وطلع روح للحوش .. وقف السياره قدام الحوش

ومانزلش ..

معاش عرف كيف ايدير .. كيف يوصل فيها

ويطمن بس .. امه وشموخ الاتنين قالو انها

مصدوم وصوت لعياط اللي سمعه صوتها لأن كان

ايميز صوتها من الف صوت ..

نزل من السياره وخش للحوش

شموخ: وين مشيت

اسماعيل: دوره البرا

شموخ: تبي عشي

اسماعيل: بنرقد وين امي

شموخ: رقدت روحت مريضه علي خاطر

هناء وخواتها تغششت

اسماعيل: باهي خشي ارقدي انتي

شموخ: النوم اللي بيجيني نستني غدوه امتا ايجي

ونمشي لهناء يارب صبرها

خش اسماعيل للدار بيرقد ..

طفي الضي .. وبدي صوت لعياط اللي سمعه يسمع

فيه في ودانه من جديد .. ناض قعمز

والليله فاتت علي اسماعيل كيف يوصل في هناء
وعلي هناء وهي تقرا في المصحف وتدعي لامها
وعلي شموخ وهي تستني الصبح امتا ايجي وتمشي
عند هناء …

وجي الصبح ومشت شموخ لهناء …

القتها مازالت تقرا في المصحف

شموخ: مارقدتيش

هناء: النوم اللي مازال بنشبحه

شموخ: نفس اللي صارلي لما توفي بوي

هناء: اتريحت واني نقرا في المصحف

شموخ: اي مافيش راحه بعده

هناء: والرقيه

شموخ: ربي يصبركم اعطيتي لخواتك منها

هناء: اي اعطيتهم الله يبارك فيكم

وفاتت الأيام وشموخ ماخلتش هناء بروحها يوميا

من اول ما اتنوض الي الليل تمشي تقعد عندها

واسماعيل مش عارف كيف يوصلها ولاحتي ايعزيها

وفي يوم كانت شموخ عند هناء بعد لاخفت من عندهم

الزحمه هدرزت معاها وجت مروحه علي رجليها

القت رضوان قدام الحوش

رضوان: اهلا بالشموخ

شموخ: خش نبيك

رضوان: نستني في اسماعيل

شموخ: خش هيا

لحقها الداخل للجنان ..

شموخ: استاحشتگ

رضوان: امس شفتك

شموخ: من لما توفت ام هناء ماطولناش في هدرزه

رضوان: ماقصرتش معانا هناء لاقبل لاتوا تستاهل

شموخ : زعمه غدوه رمضان

رضوان: مش عارف مع من بنصيمو لكن تو يقولو

شموخ: تتسحر معانا ضروري هدا اول رمضان احني

متجوزين

رضوان: تو انجي كان رمضان ولا مش رمضان

استاحشت نهدرز معاك هدرزه متع تلات ساعات اربعه

شموخ: اني كان نحكي معاك عمري كله ما انملش

رضوان: من شهر 2 نعانو الي اليوم سنه كبيسه

غبرا ان شاء الله الباقي منها خير

شموخ: خلاص وصلو الزاويه قالو في رمضان بتحرر

رضوان: ربي ينصرنا وتنتهي ومعاش نفقدو حد

شموخ: خيرگ انت متغير

رضوان: متغير لا شئ خيرني

شموخ: خيرك معاش تقولي انحبك يا شموخ

وديري بالگ علي روحك ومعاش تطلعي بروحگ

ووين خيمارگ 😞

رضوان: هههههههه اما انتي هبله وتقعدي هبله

ليوم القيامه

بعد هذا كله واتشكي في حبي ليگ

شموخ: مش شگ لكن متغير

رضوان: قتلگ هناء ماقصرتش معانا قبل لانتجوزو

من يوم عرفتك هي تساعد فينا تستاهل ومش

حنمنعك اعليها لاتوا لا بعدين وجاتك لما توفي

بوك للمستشفي علي رجليها

شموخ : امممم باه واعلاش معاش تقولي

انحبگ يا شموخ

رضوان: مش ديما تنقال مرات الافعال توريگ

قداش رضوان ايحبك

لكن انحبك ياهبله

شموخ: شن ماسمعتش

رضوان زاد صوته: انحبككك اسمعتي

شاف اسماعيل جاي

رضوان: هكي باهي عليگ حشمه

شموخ: هههههه وجهك لونه اتغير اول مره نشوفك

متحشم

رضوان: مجنونه

جي اسماعيل: هيا نمشو

شموخ: مرات غدوه رمضان نبي حاجات نرفعهم لهناء

اسماعيل: شن تبي

رضوان: تو بعدين نجيبوهم اكتبهم وتو نرجعولك

اسماعيل: لالا تو نستناك خشي اكتبيهم

شموخ: مرات ننسي شي

اسماعيل: باهي وتيهم وتو نرجعلك

شموخ: باه

• #يتبـع
  #الكاتبه_البتول_الزنتاني 👑
  #فضلا_وليس_أمرا_ادعمو_صفحتكم_
  #لايگ_تعليق ❤

بقلم: شموخ اكحيله

كانت الصدمه والفاجعه كبيره لدرجه هناء كانت اتكلم في امها وتتوقع انها اتنوض ..خواتها ايعيطو وهي تتكلم مع امها ..هناء: ماتموتيش لمن تخلينا ..