بقلم: رحمة محمود عوض

الزوجة الثانية “خطافة”؟

بالصدفه شفت بوست امبارح علي الفيسبوك من واحدة زوجها اتجوز عليها وبتمدح فيه جدا وانه هو الضحية والمظلوم الي وقع تحت انياب خطافة الرجالة ..

ايه دة هو فيه راجل بيتخطف ؟؟

لا مفيش بس دي شماعه من شماعات الرجالة الي بيعلقوا عليها خيانتهم ويبرروا لنفسهم ان فيه مليون سبب يخليه ضحيه ويتجوز علي مراته او يعرف غيرها

مبررات الراجل للزوجة التانيه عشان توافق

انا متجوز بس مبحبش مراتي – انا متجوز بس اهلي غصبوني عالجواز – انا متجوز بس هي مهملة في البيت – انا متجوز بس عمري ما حسيت الي حسيته معاكي – انا متجوز بس مستحمل عشان العيال – انا متجوز بس مراتي عيانه وخايف اسيبها اشيل ذنبها – انا متجوز بس مبحبش البطاطس …. هيخلق ميت مبرر وميت عذر لخيانته وطبعا هي هيصعب عليها اوووي وهتصدقه وتتعاطف معاه وتبدأ تحبه وتتمنا تعوضه عن البهدله الي هو عايش فيها بسبب مراته المفتريه

مبررات الراجل لما مراته تعرف بعلاقته او بجوازته الجديدة

دي صعبت عليا عشان سنها كبر ومتجوزتش – دي ضحكت عليا لحد ما اتجوزتني – دي اكيد عملتلي عمل وسحرتني عشان اتجوزها – او يكون جرئ شويه ويطلع اي عيب اهبل في مراته الي شايلاه ومحافظة علي بيته يعني مش بعيد يقولها اتجوزت عليكي عشان مبتقوليليش صباح الخير بليل

الراجل هو رقم واحد في الخيانة

نستنتج من كدا ان الراجل هو سبب الخيانة مش الست الي بيسموها خطافه الرجاله ما هي ياعيني مظلومة ووقعت فريسة للثعلب المكار الي بيستخدم كل الحيل عشان يقنعها بحبه الوهمي وانه ضحيه

وللاسف مجتمعنا لسا بيشوف الراجل طفل وبيتخطف والست خطافة رجاله. تمت

بقلم: رحمة محمود عوض

ايه دة هو فيه راجل بيتخطف ؟؟لا مفيش بس دي شماعه من شماعات الرجالة الي بيعلقوا عليها خيانتهم.