كلمة مبقتش غريبة علينا للأسف بقينا نسمعها كتير الفترة الأخيرة, كل يوم بنسمع عن احصائيات و أبحاث ومقالات ودارسات بتتكلم عن اللاجئين وكام لاجئ قدر يهرب من جحيم الحرب في بلدة ويوصل لدوله تانية لجحيم تاني أكبر بيعيشة على حدود الدول, في منهم اللي بيلحق يوصل لأي دوله، ومنهم اللي بيموت قبل ما يوصل، أطفال ونساء وكبار السن وغيرهم كتير,  وللأسف دي بقت من أكبر المشاكل اللي بتواجة العالم ككل.

سوء معاملة اللاجئين

بس هل يعقل أننا في القرن الواحد والعشرين في عالم بيدعي أنه وصل لتطور لم يسبق له مثيل وتحضر ورقي عالم يقطنة 7مليار شخص مفيش منهم شخص قدر يوصل لحل مشكله زي دي؟ إزاي بقى العالم دا بكل مافية من ساسة ومفكرين ونخبة ومثقفين وعلماء محدش عارف يحل المشكله دي؟ حاجة تزعل بجد.

بس اللي يزعل اكتر هو التعامل المهين البشع اللي الدول بتستخدمة في حق اللاجئين أصعب شعور ممكن يحس بية الشخص هو انة يحس انه بلا وطن بلا مأوى، ولا يملك حتى اقل المقومات اللي توفر لية حياه بسيطة، هو في ذل أو كسرة نفس اكتر من انك تبقى مذلول بلد تسمحلك بالدخول لارضها، وبلد ترميك في مخيمات على الحدود وبلد تذلك على حدودها بالشهور لحد ما تسمحلك انك تدخل ارضها، تغرق في البحر وانت بتحاول تهرب من جحيم الحرب والنزاعات والعنف، دوله تتهمك بالإرهاب أو تلبسك اي عملية إرهابية حصلت على ارضها لمجرد انك لاجئ.

أصل يابني اللاجئ عندهم مباح ليهم يعملوا فية اي حاجة يتصرفوا فية وفي حياتة زي ماهما عايزين، ودي حقيقة حصلت وبتحصل وهتفضل تحصل في أغلب الدول اللي بتسمي نفسها حامية لحقوق الإنسان والأقليات والمهمشين، والاكيد أن مش كل الدول بتعامل اللاجئين بالطريقة البشعة دي بس للأسف غالبية الدول بتعامل اللاجئين بالبشاعة دي، الدول اللي بتسمي نفسها دول ديموقراطية وبتطبق الحرية والعدالة والمسواة، وضد العنصرية، الدول بتدي نفسها الحق انها تعامل اللاجئين زي الطوبة من حقهم يحركوها ويتحكموا فيها زي ماهما عايزين.

اللاجئين في مصر 

بفضل الله وبرغم كل الظروف الصعبة الاستثنائية اللي بتمر بيها بلدي إلا إنها هي أفضل دولة عاملت اللاجئين، لالالا لاجئين إيه! بس المصطلح دا مش موجود في القاموس بتاعنا، ولاعمرك تسمع كلمة زي دي تتقال من أي حد من افراد الشعب احنا الدوله الوحيدة اللي ادت اللاجئين كامل الحقوق كل من اللي لجأ لمصر بيتعامل زية زي اي مواطن عادي في الدولة وأحسن كمان مصر فيها أكتر من 6 مليون لاجئ، دا الرقم الرسمي بس اعتقد الرقم الحقيقي اكتر من كدا بكتير، الـ6 مليون لاجئ كل واحد فيهم اشتغل ونجح في وقت قياسي 6 مليون قصة نجاح ل6 مليون لاجئ على ارض البلد العظيمة دي الحمد لله.

بس برضوا مشكله اللاجئين هي اكبر المشاكل اللي بتواجهة العالم، لازم انها تتحل، مش هتتحل بالكلام ولا بالشعارات ولا المؤتمرات اللي هنا وهناك، هتتحل بس لما يبقي في إرادة سياسية من اكبر السياسين لما الكل يتوحد ويفكر في حل جذري للمشكله دي، يعني هو ازاي مفيش حلول مقترحة لمشكله كبيرة زي دي؟ هو في اقتراحات زي توطين اللاجئين،حل مشكله توزيع موارد العالم بشكل عادل وغيرها.

بس دي حلول مش مجديا أو مش حلول أصلا هي مسكنات، وللاسف حتي المسكنات دي مفيش حد قابل بيها، الحل الوحيد للمشكله دي هو إننا ندور على أساسها، نشوف فين أصل المشكله نقضي على النزاعات والحروب نفعّل اتفاقيات السلام، يبقي عندنا إرادة وعزم حقيقي على إنهاء الانقسامات اللي بنعيشها كل يوم، غير كدا كلام فاضي✋.