موقع مقال موقع تواصل اجتماعي يتخذ من المقال وسيلة تعبير وتفاعل، وينتج فيديو عن كل مقال
مش عارف ليه بنستهون بفعل ” الطبطبه ” ده مع انه مهم ، هو احساس اكتر من انه لمسه ، و اعظم طبطبه هي اللي بتيجي من فوق ، الطبطبه اللي بتحسها علي قلبك من جوه دي مش ايد بتلمسك ،هي الطبطبه اللي بتيجي من عند ربنا ، وعشان اوقات كتير مابتقدرش تطلبها من حد و وساعات في اوقاتنا الصعبه مابنقدرش اصلا نقول فينا ايه عشان حد يطبطب علينا.
العجيب انها بتحصل معانا طول الوقت بس هل بنشوفها ؟! ، هل فعلا بنحس بيها ؟! هل بنفهم انها طبطبه من ربنا علينا ؟! .. ساعات من كتر الزعل والحزن والأحباط والقلق من كل حاجه وعلي كل حاجه وفي كل حاجه مابنخدش بالنا منها وبيبقي صعب نشوفها من اول لحظه ؛ ارجع دلوقتي لمواقف عديت عليك في حياتك كتير هتلاقي ربنا ياما طبطب عليك ؛ يمكن كنت متضايق و طبطب عليك بمكالمه تليفون من حد بتحبه ماتكلمتوش من فتره ، او طبطب عليك بكلمه حلوه من حد في عز احباطك وفقدانك لثقتك بنفسك ، او طبطب عليك بلحظه نجاح في شغلك وسط ضلمة فشلك في علاقة او مشاكلك في بيتك او مع اهلك ، ويمكن طبطب عليك في وسط كل مصايبك بحد بتحبه وبيحبك يبقي جنبك او يعوضك بيه عن شخص كان غالي عليك وفقدته ، ويمكن طبطب عليك لما عربيتك (عاملتها) بحد جدع ماتعرفوش وقف معاك ، يمكن طبطب عليك بضحكت طفل في وشك تخليك تمسح دموعك ، يمكن طبطب عليك بفلوس ماكنتش متوقعها تجيلك في عز زنقتك او احتياجك ليها ده ساعات بتبقي قمة الطبطبه ان الفلوس اللي في جيبك علي قد الموقف اللي انت فيه او الحاجه اللي نفسك فيها بالظبط .. مواقف الطبطبه من ربنا حاصلت لنا ولسه بتحصل لنا وهاتحصل لنا لان رحمة ربنا مابتخلصش.
ده النوع المباشر من الطبطبه انما النوع التاني “مبيبقاش علي هوانا قوي” او يمكن مابنفهموش في الأول او بنظرتنا الضيقه مابنفهمش قصد ربنا منه او مابنفهمش انها طبطبه من ربنا من اصله ، ارجع لمواقف كتير في حياتك مثلا : لما تخلص قصه حب ، او تتفشكل خطوبه او تبوظ جوازه او تنتهي حياه ما بين اتنين بعد سنين وممكن تكون علاقات حاربنا وضحينا فيها وعشانها كتير واكيد كل واحد فينا عدي علي الأقل مره بواحده فيهم في حياته .. وقتها مشاعرك وعقلك المحدود “ضحكوا عليك” وفاهموك ان الحياه خلصت مع لحظه خسارتك للشخص ده وفي مننا بيسأل ربنا ليه ؟! ، و في مننا بيفسر ده بأنه زعل من ربنا منه ! .. ويفضل قلبك وعقلك يخدعوك بأسباب (وهميه) ويحسسوك بالذنب او انك المسئول عن الفشل او انك كان المفروض تعمل اكتر من كده او كنت تستحمل شويا كمان ، الطبطبه هنا ان ربنا شال من طريقك الشخص الغلط ، منع عنك علاقه فيها ضرر كبير ليك يمكن انت مش شايفه دلوقتي لان ربنا دايما شايف “ابعد منك” ! وربنا دايما عايزلنا الخير اكتر مانا وانت عايزينه لنفسنا ، ارجع كده لأي حكايه خلصت انت زعلت ساعتها (واتقهرت) وشوف هتلاقيها ” احسن لك انها خلصت” و كل الحكايه ان ربنا كان عايز يبعتلك رساله تفهمهما او درس تتعلمه مع الشخص ده ويمشي لان ربنا دايما بيعلمنا بطريقة “المحن والتجارب” ولو انت ماستلمتش الرساله او مافهمتهاش في هي مشكلة حضرتك لوحدك! ، اديك مثال تاني مش احيانا بتتأخر علي ميعاد مهم او تحصل حاجه تعطلك عن حاجه و تبقي زعلان ومتضايق و(متكدر) وتكتشف ان تأخيرك ده كان فيه خير ليك او ان ربنا حب يحميك من حاجه تضرك وساعات بييقي نجاجك وكتبلك “عمر جديد ” .
عايز تعيش مرتاح اكتشف دايما ربنا بيطبطب عليك ازاي ! ، الطبطبه ممكن تبقي اب و ام ربوك وعلموك كويس في غيرك ماعندوش ، الطبطبه ممكن تبقي عيل ربنا رزق بيه في جوازه يمكن ماتكونش سعيده بالنسبالك لكن في غير بيتمناه ومستعد يدفع من عمره و يبقي عنده طفل ، الطبطبه ممكن تكون في عربيه بتروح بيها الشغل مرتاح في غيرك بيتبهدل كل يوم ، الطبطبه ممكن تكون في شغل بيطلع فيه عينك ولكن بتقبض مرتب معيشك كويس في غيرك بيدور لسه علي شغل ، الطبطبه ممكن تكون في اي نعمه ربنا بيديهالك وغيرك محروم منها ، المواقف كتيره وحياتي وحياتك مليانه “بطبطبة ربنا” علينا ، انت مش هاتقدر تتحركك من مكانك من غير طبطبته عليك ومش هاتعرف تكمل حياتك ، بص وراك في حياتك شوف كنت فين و بقيت فين دلوقتي شوف خرجت من كام مصيبه علي خير شوف بعدت عن كام حاجه ماكنش فيها خير ليك هاتعرف قد ايه ربنا كان كريم –جدا- معاك ، احنا مالناش في روحنا حاجه والحقيقه ان احنا اضعف ما نكون بدون ربنا .. ربنا اكبر بكتير من ادراكنا المحدود وقدرتنا الضعيفه ، وربنا ماعرفهوش بالعقل زي ما بيقولوا .. ربنا عرفوه بالقلب.
فيديو مقال لما ربنا يطبطب عليك
