فروقات الحياة

كتير مننا بيعيش يندم على كل حاجه عدت من حياته حتى لو كان نفسه إنها تعدى ويرجع تانى يفكر فيها بشكل مختلف أو طريقه جديده تحسسه إنه فقد حاجه كان ممكن تكون هى دى مصدر للسعاده وف نفس الوقت بيحمد ربنا انها عدت علشان كانت بتمثل أزمة ف وقتها .
مفيش واحد مننا بيقدر يحكم على اللى عدى بس الجميل من كل اللى بيفوت ف حياتنا ان إحنا بنتعلم أسلوب جديد ف التعامل مع اللى هيحصل ف الحياه أشخاص بقى او مواقف او حتى الذكريات نفسها إزاى نعدى ونتغير وننسى الوجع او الحزن او أشخاص كانوا حاجه فى حياتنا بس بقوا بالنسبه لنا ولا حاجه .

شروط مهمة في الحياة

بس بالرغم من الماضى وكل ذكرياته ﻻزم نحط فى دماغنا حاجتين مهمين جدا( شرطين) هيفرقوا أوى ف حياتنا وممكن يحكموا تصرفاتنا

الشرط الأول :

البقاء والاستمرار بالرغم من ان مراكز كتير للتدريب وكتب كتير اتكلمت عن البقاء فيه اللى إتكلم عن البقاء كفكره وجود فقط واكيد كلنا سمعنا امثله بتتكلم عن البقاء زى البقاء للاقوى والبقاء للاصلح بس الاصل ف البقاءللاذكى ، الاذكى هوا ده اللى بيقدر يسيب بصمه ف كل حاجه وبياثر ف اللى حواله أشخاص او أماكن، وفكر ف كدا ملوك وحكام كتير ف كل الحضارات زى مثلا الفراعنه عملوا تماثيل ومقابر محميه ومتجهزه لده ،وزى ملوك الصين كان فيه ملك مهوس بالبقاء والخلود وبعد ما خد رأى الوزراء بتوعه اقترحوا عليه يضيفوا الزيبق ف اﻷكل ويضيفوا معاه مواد كيميائيه بس للأسف بعد مرور الزمن الملك ده اتجنن ومكملش حلم البقاء بتاعه ومضلش من حياته غير انجازاته .
وزى ما بنشوف برامج كتيره عن البقاء واساليبه فكرتها كلها مبنيه على أساس ان مجموعه من الاشخاص او الشباب بينزلوا ف مكان معين من البريه او الصحراء او الغابات ويبدأوا بأبسط الامكانيات والأفكار اللى بيستخدموها ف رحله استكشاف وبقاء ويفضلوا يطوروا مغ الأحداث والظواهر المحيطه بيهم ويطوروا من نفسهم لحد ما يوصلوا لبر الامان ، كدا بردوا مع نفسك علشان تقدر تثبت ذاتك ممكن تكون امكانياتك بسيطه ،بالامكانيات دى وتوظيفها صح هتقدر توصل لأهدافك الكبيره وهوا ده سر البقاء بذكاء من غير ما تستسلم للحزن او الهم او الفشل .

الشرط التانى :

إثبات الذات وده بيتحقق بشويه عوامل مهمه أهمها وضع خطه معينه او هدف وده اللى قدرت لو توضحه لنفسك هتعيش مبسوط وهتروح لهدفك بكل سهوله ولو حتى ما اتحققش كله بس بتوصل لحاجه ترضيك او هتفرحك ، وف كل الأحوال عيش مع نفسك واتعايش معاها واللى ما تقدرش تعمله اشتريه إزاى؟ بإصرارك على النجاح علشان تحققه إستخدم كل الطرق المشروعة وغير المشروعه بالاجتهاد والتعب و المعامله الحلوه والكلام الطيب ﻻزم تصنع أنصار مش أعداء فى كل مكان ، حط ف دماغك النجاح لو حتى كنت مش ناجح
ﻻن الفشل كفكره بيتحقق واحده واحده لو ضعفت واستسلمت .اعمل لنفسك خطه إصلاح شامله بمده زمنيه معينه ووقت للمراجعه ف نص الخطه دى وتكون مبنيه على عيوبك وممزاتك،إعرف كل عيوبك وابدأ إشتغل عليها او صلحها ف خطه الاصلاح الشامله دى ، بص على علاقتك بربنا وعلاقتك بنفسك وعلاقتك بالناس مين عايزك تنجح ومين بيحقد عليك او أعداء النجاح، خليك مع النوع الاول وخد منه النصيحه اما النوع التانى ده ما تبصلهوش وﻻ تعمله اى اعتبار واعتزل ما يؤذيك هتعيش مبسوط .

فيديو مقال لا تستسلم …. فهى معركه البقاء – مقال #باللهجه_المصريه.